• November 16th, 2018
Login / Register

Babeleki bakwamukoti ba akaleza balekisi babona kukolwa kwa musebezi


Matheus Hamutenya Keetmanshoop-Babeleki bakwamukoti wa Scorpion Zink kwa Rosh Pinah babata kuli baetapili babona bazekiswe kakuli kuti bayanga kwamusebezi mwa mandingwe abucwala. Mwakucaula kwabona kwa kozo, Labulalu, babeleki nebafile liñolo labona lalipilaelo kuyomuhulu wamukoti Irvan Simataa, banze batiseza kuli babañwi babaetapili babona bana nimukwa wakutaha kwamusebezi bazezeliswa kimutoho, mi bahana kutatubwa mayemo abucwala mwamubili wabona sina mañinimañi yakena mwamukoti. Nebabialezi hape kasebeliso yalunya, hamoho cwalo nikubelekela mwa mayemo maswe mwa mukoti. Nimukwa wakuli misebezi yepahami mwa mukoti ifiwa feela mazwahule. Membala wa Katengo kakayemela babeleki bamwa mikoti kakazibahala ka Mineworkers Union of Namibia (MUN) kwamutai wa Rosh Pinah, Petersen Kambinda, ili yana balile liñolo lalipilaelo, nabulelezi ba New Era famuhala kuli babeleki balemuhile pilaelo yakuli baetapili bataha kwa musebezi bakozwi. Mi bahana kutatubiwa mayemo abucwala mwamubili pili basikakena mwa mukoti, mi babañwi sebana nimukwa wakusebelisa munyako usili ili kuli bayosebeza bakozwi kusina mutatubi yabalimbulula. Natalusize kuli ñohola babeleki nebatibezi yomuñwi wabaetapili kasamulaho wakumulimbulula kuli nali mwa mandingwe abucwala. Mi kasamulaho akumufapeleza kuli atatubiwe mayemo abucwala mwa mubili, nekufumwi kuli kamaniti nakozwi. Kambinda naize mikwa yecwalo kiyemaswe kwa babeleki babañwi. Naekelize kuli kasamulaho wakezahalo yeo babeleki nebana nimabaka akulumela kuli likakalezo zabona neli zaniti, sihulu habahana kutatubiwa mayemo abucwala mwa mubili, hamoho cwalo nimikwa yabona yesa swalehi hande. “Batu ba bataha kwa musebezi kuto sebebeza mibahana kubuyelela mwakatatubiso, mi batu ba bakozwi bao balumelelwa kukwaeza mwa mukoti, taba yeo itoloka ñi? Kikozi kwa babeleki babañwi,” nabulezi. Babeleki balaela kuli baetapili babane balilimaniswe famusebezi kalibaka lakutaha kwamusebezi inge bakozwi, nebaize mulao wa kuli hakuna yaswanezi kutaha kwa musebezi inge akozwi usike wabeelwa kwa tuko. Babeleki nebabilaezi hape kuli baetapili habautwi likelezo kuamana nimayemo amukoti kuzwelela kwa macaziba, kubaeleza kuli kulonga kufita tikanyo kukatisa kozi mi nebaize nekutisize kuyepeha kwa musima ñohola mwa kweli ya Ñulule. “Mamota nawile kakuli nebaicanganisize hala likelezo kuzwelela kwa macaziba– seli mukwa wakuli milao yamwamukoti hailatelelwi, kono bupilo bwa batu buswanela kuba bona bwa pili.” Mwaliñolo la linonge nebabilaezi hape kuli habafumani lituto zakuli bahule mwamusebezi, ni kuli babelekisi babona habana nako yakukandeka nibona, nebabuzize hape kuli kiñi bayahi ba South A Africa habalibona babasweli litulo zabuetapili.
New Era Reporter
2018-01-08 09:33:10 10 months ago

Be the first to post a comment...