WALVIS BAY – Babeleki bababeli nebatimezi kwamusebezi, kasamulaho akutiba mwamushini opomba mutabani mwa Walvis Bay, Labune viki yefelile. Kozi yeo nebile teñi nako yalico zamusihali. 

Nekubihilwe kuli baana nebatibile hane bapatehile nimusebezi kwasiteshini sakupompa mutabani. Babeleki bakatengo katolopo ya Walvis Bay, viki yefelile nebasika talusa hande sene siezahezi, kono New Era iutwisisa kuli baana neba buyezi moya omasila pili basika wela mwamushini. Yomuhulu wazakutimisa mulilo mwatolopo ya Walvis Bay, Dennis Basson, nabulelezi babihi bamakande kuli litupu nelifumanwi mwamushini. 

Yomuñwi wabane batimezi neli mubeleki wakatengo katolopo, mi yomuñwi nabeleka kwa kampani yefilwe peleko kikatengo katolopo. “Isali kuitahanela kuli lutaluse sene siezahezi kakuli lipatisiso lisa zwelapili. Mi nibane batimezi nebasakonwi kuzibahazwa, kakuli bahabo nebasika zibiswa kale,” Basson nabulezi. 

Mwamakande amañwi kwamawate, muyahi wanaha Angola, Israel Hamutenya walilimo ze 28 ukulubelwa kuli natimezi kasamulaho akucaisiwa kimotikala yelonga libyana. Mi piho nekile yafiwa kimapokola basikiliti sa Erongo.