Balekisi bamwamakululu mwa Katima Mulilo babilaela kasamulaho akutibelwa kulekisa mwamakululu aKatima Mulilo kikatengo katolopo mwakezo yebanga kuli nesiyo hande.
Katengo katolopo nekapotezi balekisi Labulalu kuyo batolokela maemo, kono kubateñi kwabona nekubanyemisize.
Balekisi bamwamakululu bane babonisize kubifa kwabona nebaize nebatutiselizwe kwasibaka kokubonahala kuli habana kufumana ñambekelo, bakeñisa buhulu nibaleki babona. “Luka pila cwañi ni banabaluna babasiiwa baya kwalikolo basina lico, kakuli lulatehezwi kibaleki baluna? Buñata bwabona babakana bataha kwanu bakatoleka feela kubahabo.
Hakuna zelukana luisa kwamandu,” nekubulezi mulekisi yana salati kuzibwa.
Katengo katolopo nekalemusize balekisi kuli bakafiwa sibaka kwakulekiseza kwamusika ni libaka zeñwi zekaketiwa.
“Bakeñisa mabaka abuiketo, sina likozi zafamukwakwa halinze liekezeha, hamoho cwalo nikutokwa limbuzi, kacwalo hakuna mwakuezeza konji kubona kuli mulao watalelezwa. Batu kaufela balekisa mwamakululu hakuna hande likuta,” nekubulezi yomuhulu wakatengo kakamaiso John Ntemwa.
Muyemeli kwakatengo katolopo Watson Kalaluka nabulelezi balekisi kuli katengo kautwisisa lipilaelo zabona mi likatalimwa.
“Lutile kwanu kakuli lwatokomela, bakeñisa mulao ni lipilaelo zabuiketo, kulekisa mwamakululu hakukoni kuzwelapili,” nekubulezi Kalaluka.
Yomuñwi wabalekisi bamwamakululu, Mercy Maswabi naize na utwisisa zeo babulela balipolitiki kono halumelelani ni mukwa obaeza lika kaona.
“Hakuna zeni lekisize kuzwa kakusasa, kacwalo hanina kukwanisa kuisa sakuca kwandu.
Nikaisezañi banabaka kacenu, bakayo lobala nitala. Lubulelezwi kuli bakaluisa kwamusika. Kono neni kile nakupa sibaka mwamusika nenibulelezwi kuli hakuna, kona hane nizwezipili kulekisa mwamakululu,” nekubulezi Maswabi. Balekisi nebabilaezi hape kuli nebasika fiwa nako yakuitukisa kututa. “Nelubulelezwi feela Labutanu kuli lwatutiswa Lamubulo,” nekubulezi mulekisa ya nyemile.
Zeo halili cwalo mulekisi yana zibahala ahulu Judith Limbo walilimo zemashumi amane kazelobapeli yana lekisezanga fapila sintolo sesili mwatolopo, nakile aomelela mi ayo timela hafita kwasipatela sa muuso sa Katima Mulilo Lamubulo, kasamulaho akuomana ni mapokola. Sibuabui wasipokolasa Zambezi Kisco Sitali, nakile abulela kuli sene sitisize lifu nesisi kapatalazwa. Kono lipiho zeñwi neli ize natimezi bakeñisa kuli nakula butuku bwa kupahama kwamali mwamubili.