• September 24th, 2018
Login / Register

Balimi basiya kulima kabaka lakutokwa pula


Aron Mushaukwa Katima Mulilo-Balimi babuloto mwasikiliti sa Zambezi base basiile kulima masimu nikucala bakeñisa linanga lakutokwa pula nipuka. Babulela kuli base bakatezi kulibela kakuli kuzwelela makalo asilimo pula haisikanela, mi kacwalo mubu uomile mi basiyezi basina sepo. Kusanela kwapula mwakweli ya Njimwana nimakalo akweli ya Ñulule nekusikatusa. Nihaike kuli nekubonahala kuba nisepo pula haikala kunela fahala kweli ya Ñulule, ili taba yene susuelize balimi kukala kupazaula masimu, kono neli taba yanakonyana feela.   Hana bulela niba New Era yomuñwi wabalimi babazibahala hahulu mwa sikiliti sa Zambez, Alfred Tendekule kuzwelela kwa Samudono, naize utuhezi kulima bakeñisa kutokwa pula, kakuli yena sina buñata bwa balimi bakwamahae, baitinga feela kwapula hainela. “Haninze nibulela fa ninzi mwasipani, kono babeleki nibalukuluzi kuli bakute kwahae kakuli lutuhezi kulima kakuli mubu uomile hahulu. Ninzi feela kwanu kubabalela likomu,” nekubulezi Tendekule. Naekelize kuli kanako yeswana ñohola nekuna nisepo kakuli pula nenela, kono cwale ulatehezwi kisepo kikalibaka leo utuhezi kulima. “La 8 Sope ñohola hanilikanya mayemo apula mwasimu yaka neli limilimita ze 28, kono kachenu (Lamubulo viki yefelile) hanilikanya nekusina,” nekutalusize mulimi. “Neni yemi mwasimu yene nicezi kala 5, kono hakuna sepo yakuli ikamela kakuli mubu uomile,” nabulezi. Hana buzizwe kuli uzwafa cwañi haiba nekufitile feela mazazi amalalu naize: “Haiba masimu ane nicezi la 1, 2 ni 3 Sope hasikamela sesikatisa kuli ye imele kisikamañi?” Tendekule nabulezi hape kuli buñata bwa balimi mwa sibaka sale basebatuhezi kulima nikucala mi babulukile feela lipeu zabona, kakuli basaba kuli bakaswana balisinya feela habakacala. Nabulezi hape kuli lipeu zene bacezi mwakweli ya Ñulule nizona halisikamela hande. “Mokubonahalela nikona kubulela kuli hakuna kuba nikutulo sakata. Mwendi kubale babaselaela masimu abona – haili luna babaitinga fa pula hakuna sepo. Mulimi yomuñwi Chika Kolokwe yasimuluha kwa Muyako nabulezi manzwi aswana. Naize nacezi lifolo zetalu kono mbonyi yahae haisikamela kakuli pula nesikanela. “Nenicezi mbonyi yaka la 2 Ñulule kono ninako ye haisikamela kale – halusaziba sakueza, tala ikalubulaya - hanizibi kuli muuso ukalutusa cwañi. Zeo halili cwalo, Iganatius Simbuwa yazwa kwa Maunga kiyomuñiw wabalimi babalitoholo bao mbonyi yabona imelile. Naize nacezi mbonyi yahae liviki zetalu zefelile, mi kalitohonolo pula senela. “Mbonyi yaka imelile mikale ihula hainyani – kalitohonolo ikaswana inela mwaliviki zepeli zetaha, hakukaba cwalo ikaswana ipila,” nabulezi. Kono niyena nalemuhile kuli mwalibaka mo pula nesikanela balimi kamaniti basiyezi basina sepo – kono yena hasikasiya kucala peu, kakuli hasika zwafa kale. “Nina nisepo yakuli ikanela hape,” nabulezi.
2018-01-17 09:38:44 8 months ago
Share on social media

Be the first to post a comment...