• September 21st, 2018
Login / Register

Balimi mwa Zambezi balima sinca masimu

Languages
Languages

Aron Mushaukwa Silumbi-Balimi bamwamahae mwa sikiliti sa Zambezi base bakalile kulima sinca kasamulaho wapula yende kuzwelela makalo akweli. Ba New Era hane bapotezi libaka za Silumbi ni Sikanjabuka Labune viki yefelile balimi nebapatehile kulima sinca nikucalula mone bacezi kale. Hane babulela niba New Era balimi nebatiselize kuli nebasina buiketelo haisi kulimulula nikucalulula kakuli peu yene bacezi nesikamela, mi mone kumelile mbonyi nesikahula hande kakuli necisizwe kilizazi.   “Nenisalati kulimulula kono babañwi neba nisusuelize kasepo yakuli mwendi lukaswana lwafumana sesiñwi. Nikabulela kuli kitaba yelyanganisa kakuli ye hakiyona nako yelulimanga, kakuli kanako ye kambe selusweli kutahulela mi kweli yetaha nelukakala kuca mutamuno, “ nekubulezi mulimi yomuñwi Regina Mujiwa. Naekelize kuli sina balimi babañwi nacezi mbonyi yahae mwakweli ya Ñulule pula haiseula, kono peu yahae nesikamela mi mwalibaka zeñwi neimelile kakukauhana. “Sina hamuiponela nipatehile kucala sinca hanizi kapa nikakutula sesiñwi kakuli cwanuñu muunda ukataha nikutotibisa.” Balimi babañwi bane bapatehile kulima nebabile nimaikuto aswana. “Nelu utwile kuli pula itelezi kacwalo nelusati kusiyalela mwamulaho, kalitohono lukaswana lwakutula sesiñwi,” nekubulezi Richard Mulike. Kukuta kwapula hakusikatisa feela bunde kakuli likomponi zamandu anaikahela zecwale ka Choto ni Cowboy litibile. Haneli sibaka samalobalo sabasizana sa sikolo sesipahami sa Caprivi Senior Secondary nisona nesi siezi sicimbami mwamezi. Libaka zeñwi zefumaneha mwa Kabbe yambowela zecwale ka Nankutwe, Nsundwa, Itomba, Ivilivinzi, Mbalasinte, ni Kasika nizona kuya teñi nako ye hakukonahali. Haneli libaka za Mpukano ni Muzii zona liselikwalezwi kimezi amuunda. Mezi mwanuka ya Lyambai Labune nayemi famihato yekuma fa 2.57 hakubapanywa ni 2.18 yañohola kalizazi leliswana.
2018-02-12 10:56:43 7 months ago
Share on social media

Be the first to post a comment...