Home / BIG Coalition A Tameka Okugandja Oshimaliwa kAakalimo pOtjivero BIG Coalition A Tameka Okugandja Oshimaliwa kAakalimo pOtjivero
"WINDHOEK Ongundu yaakalimo yotango mOtjivero moshitopolwa Omitara metiyali okwa li ya pewa oshimaliwa shawo oodola N$100 momuntu kehe koBasic Income Grant (BIG) Coalition. Etopolo lyoshimaliwa shoodola ethele komuntu kehe olya tamekele metiyali nokuhula metitatu, nolya kwatela mo einyolitho neshilipaleko lyoonakupewa oshimaliwa oshowo etopolo lyoyene lyoodola ethele komukalimo kehe. Ongundu yaakalimo oya kala ya gongala kohi yomiti nokuhambelela pakuhakela omake pethimbo omuntu kehe ta pewa oodola dhe ethele. ""Ngashingeyi onkalo otayi ka hwepopala okuza nena,"" osho omukulupe gumwe ngoka ta tekula uutekulu we utatu mboka wu li oothigwa a tumbula. Omagumbo ogendji moka mu na aakulupe oga kala haga hupu ashike koshimaliwa shopenzela, hakulanda ashike iikulya ndele niimaliwa yi nasha noofuto dhosikola. Kuku Bettie Naugas okwa kundaneke oshifo shika kutya ita ka vula ashike okulanda iipumbiwa yosikola ndele ota ka landa wo iizalomwa yoothigwa dhe ndatu dhoka ta tekula. Max Smith ngoka e na aanegumbo ye li 12 ota ti osheetwapo shika shoBIG osha kutha po omukundu. Ongomuniilonga gopakathimbo moofaalama dhopaipindi, okwa kala ha mono ashike N$200 sigo N$300 komwedhi okupititha oompumbwe dhaanegumbo ye. ""Otwa kala hatu hehela iikulya poompito dhimwe. Ihe ngashingeyi otatu ka kala tu na oshimaliwa sha gwana okulanda iikulya, okufuta osikola nokupungula oshimaliwa opo tu ke shi longithe moompumbwe dhomonakuyiwa,"" Smith ta ti. Omukundu omunene ngoka gwa taalela omagumbo ogendji ngoka ge li moluhepo olunene ogwo iikulya. BIG okwa ningile omapekapeko ge nasha noonkalo dhuuhupilo waakalimo muNovomba omvula ya zi ko. Oshifo shika oshe shi koneke kutya oyendji yomaantu mboka ya pulapulwa oya nyenyeta shi nasha nondjala, oshoka okwa li ashihe haya vulu okumona iikulya lwaali mesiku, nenge poompito dhimwe lumwe. Omapekapeko ngaka natango otaga ka ningwa konima yoomwedhi hamano kehe muule woomvula mbali tadhi landula opo ku talike kutya oshimaliwa shoka hashi gandjwa osha eta po elunduluko li thike peni. Omusita Claudia Haarmann gOmbelewa onene yoBIG ota ti aanona okuza momagumbo 50 ngoka ga pulapulwa okwa li ya tulwa koshiviha opo ku talike onkalo yawo yi nasha niikulya - iitungithilutu. Otaku tengenekwa kutya aanona mbaka oya kwatwa kamanyutu, ano ihaya mono iikulya ya gwana. Iizemo yomapekapeko otayi ka pitithwa muMaalitsa konima ngele omauyelele ngoka ga monika po ga konakonwa. Osheetwapo shika shokugandja oodola ethele, otashi ningwa momalolelo maakalimo 1 000 lwaampoka mOtjivero muule woomwedhi 24 sigo Desemba omvula tayi ya, 2009, okuulika kutya oprojeka yi nasha negameno lyuuhupilo/iiyemo otayi vulu okulonga nokweeta po iizemo tayi hokitha. Momukanda gwa pitithwa metiyali, embwinda ndika lyomahagano ogendji otali ti olya tegelela osheetwapo shoBIG shi tulwe miilonga kEpangelo moshilongo ashihe, ngele osha shilipalekwa pamalolelo ngaka kutya otashi vulu okulonga nawa. Sigo oompaka, embwinda olye shi pondola okugongela iimaliwa ya gwana okugandja oshimaliwa shika uule womvula ayihe, notaya tsikile okunyanga oshimaliwa komahangano gayooloka. Aakalimo yomOmitara omvula ya zi ko oya totele po Okomitiye yOprojeka yoBIG okushilipaleka kutya oprojeka yoBIG otayi humu nawa komeho. ""Ngele otwa piyaganeke iinima nena Namibia alihe otali ka ndopa naAfrica otali ka talika ko iihuna yowala. Oprojeka ndjika otayi ningwa omalolelo mOmitara, nomeho guuyuni oga tala kutse,"" osho ekotampango lyokomitiye tali ti. Omunashipundi gOkomi-tiye, Steven Eigowab, ota ti okwa nyanyukwa sho embwinda lya tula euvaneko lyalyo miilonga, noshigwana oshe shi tala ko einekelo lyasho lymonakuyiwa. ""Otwa kala twe shi tseya kutya otashi ka tameka esiku limwe, ngashingeyi osho shika mpaka,"" osho Eigowab ta ti nokugwedha po kutya oprojeka ndjika otayi ka shunitha pevi onkalo yoluhepo, omikithi, uumbwanda, ethipombinzi nomahepeko pailonga. Okushilipaleka kutya oshimaliwa shoka itashi longithwa nayi okulanda iikolitha, okomitiye pamwe naakalimo oya tula po oondjindikila dhokupatulula/okudhengela oombashu odhindji mOtjivero. Moshitopolwa ngashingeyi omu na uundingosho uhamano, mboka utatu wu li paveta. Omolwonkalo yoluhepo moshitopolwa shika, elongitho lyiikolitha oli li unene pombanda. Oshifo shika oshe shi koneka kutya pethimbo lyomafudho gokomumvo, ositola yimwe yiikolitha oya gongela omakende goombiila gongushu yoodola N$6 000. Omunashipundi gokomitiye ota ti aakalimo yaali ngashingeyi oya patulula uusitola wiipumbiwanima yesiku opo ya yakule aakwashigwana. "
Your experience on this site will be improved by allowing cookies.
