Mubihi wa Mutende

Windoko – Mulena wa Masubia Kisco Liswani III ubilaezwa kikuekezeha kwa mandui kuzwelela mwa naha Zambia, ili babayamba isi kamulawo kakusebelisa tunyandi totusikalumelelwa mwa Namibia. Mulena Liswani III yanali mwa Windoko kwamukopano wa silimo wa malena ni mangambela bababona, ili teñi nebabile nimukopano ni mueteleli wa naha Hage Geingob kuikambota falitaba zeo malena batalimana nizona zazi ni zazi. Mulena wa Masubia nanyazize taba yakuli nihaike khuta yahae sebihile kwa liluko la bundui mwa Katima Mulilo, kuamana nikuyamba isi kamulao kwa Lisa la Manyonga kwa Malindi, ili kokufumaneha hahulu litapi kuisa mwa masa ni linuka zeli kwa Luhonono, Namiyundu, Nankutwe, Muzii ni libaka zeli bukaufi, butata busazwelapili.

“Basebelisa mikwa yefosahezi kuswala litapi ili kalulo yese nyinyifalize litapi,” nekubulezi mulena. Naize kuyamba kufiteleza tikanyo kokuetelezwi kakusebelisa tunyandi totubizwa ‘’satani” ni masho ashengile, kutisize kufela kwalitapi kokusikabonwa kale, mi kutisa kuli batu bahae batokwe busunso. Nakupile Likwambuyu wa Liluko la Bundui, Bernhardt Esau, kualabela kwapilaelo yeo kabubebe, kakubeya batatubi kwamukulela wa linuka za Zambezi sihulu kuzwa Malindi kuya Muzii. Mubusisi wa sikiliti sa Zambezi Lawrence Sampofu nakile anyaza taba yakuyamba kufiteleza tikanyo mwa sikiliti sa Zambezi naize: “Litapi ni bundui kikalulo yasizo nisifumu hala batu babapila mwa sikiliti sa Zambezi. Simbule sesili mwalinuka sisweli kusinywa kibatu bamalengwami, ili taba yesinyeza sicaba fobapilela.”

Liswani III nalumelelani ni manzwi amueteleli Geingob yana ize ukatalima taba yakulumela limembala zasisole sa naha kutusa mapokola bababonahala kuli bana nimusebezi omuñata sihulu hala litaba zakutibela busholi, bubulai, nilataba zeñwi zamabasi. Mulena nanyazize hape hahulu taba yabusholi bwa likomu ili taba hape ye ezwa kibayahi banaha Zambia, babasweli ku uzwa likomu mobakonela bakeñisa kutepelela kwamuseto. Naize masole bakona kusebeliswa mwakulwanisa bubangoki kwamiseto. Naize manduna bahae ba amuhelanga lipiho zabusholi bwa likomu viki ni viki.