Butuku bwataku ni mulomo bone bufumanehile mwalibaka zeñwi mwasikiliti saZambezi, bunze buyandulukela kwalibaka zeñwi kakuankufa. Butuku bobu yambukela kapili nebukile bwa swaliwa la 27 Kandao, kasamulaho alitatubo zene ezizwe mwalabalatoli la 3 Mbuwana 2021, kuzwelela kwamunzi wa Kasenu, mwasilalanda saKabbe yaMbowela mwasikiliti saZambezi, mi butuku bobuswana bubihilwe kuli buse buyandulukezi kwalibaka zeñwi mwasilalanda sesi swana, ili minzi yecwale ka Luhonono, Namiyundu, Nankutwe ni Ikaba, mi likomu zelikana 795 lise liyambuzi butuku.

Hana fitisa manzwi atemuso, yabona zakutatuba limunanu mwaliluko la njimo Dr Albertina Shilongo naize kukulubelwa kuli butuku nebuzwelela kwalinali zeikasanelanga nikukukopana ni likomu mwamabala. 

“Kono lipatisiso zaluna kufumana
luli kobusimuluhile butuku lizwelapili. 

Kuyanduluka kwabutuku kuya kwaminzi yeñwi kutisizwe kikuzamaya kwalimunanu kuya kwasaana kuyobata mafulelo sakata,” nekubulezi Shilongo. 

Napakile hape kuli mupendo walikomu mwalibaka zetaselizwe hahulu ukalile.

Kutisa cwale likomu zelikana 68 544 hala zelikana 75 000 seli pendilwe,
ili kuyemela 93% yalikomu zelelezwi.

Kakulatelela mulao silalanda saKabbe sizibahalizwe kuba nibutuku, mi sikiliti saZambezi kaufela sizibahalizwe kuba mwakamaiso yakufukuza butuku. Naize kalulo yeo ikanga mazazi alishumi kaamane. Kayona nako yeo hakuna likomu zelumelezwi kuzamaya zamaya, mi hakuna babakafiwa mañolo akuzamaisa kapa kubulaya likomu. 

Kuekeza foo, kuezizwe libaka zamiseco mi sicaba sikupilwe kuswalisana ni bamulao. Haneli kubulaya nama yabusunso ni mikiti kona kulumelezwi. Kono nama yeo haikoni kuzamaiswa kapa kufondotwa kwalibaka zeñwi.