Ovakalimo vomodoolopa yEenhana ova mona ofikola ipe eshi ouministeli wehongo wa tunga ofikola kolukanda Ekola-Omhito. Ofikola ei oya patululwa mOmaandaxa pambelewa.

Ofikola oya tungwa i na eendodo dopetameko okudja poshikunino fiyo ondodo onhivali notai ka kala i na fiyo ondodo onhiheyali momudo 2027.

Oya tameka nale okuyandja eetundi kovanafikola 284, pamwe novahongifikola ve li vaheyali hava longo po.

Oshiputudilo shopetameko eshi shipe osha lukilwa Olivia Nakale umwe ou a kala ta dana onghandangala ya kula mokuyambula po ehongo modoolopa yaEenhana, yee okwa li yoo vali omukulunhufikola mukulu keefikola dihapu.

Olivia Nakale Primary School oya tungwa i na eengulufikola heyali, oundjuwo, nongulu yokutuvikila oilongifo yofikola.

Omatungo aa okwa tungwa po kongushu yoshimaliwa N$2,556 532, 66.

Moshipopiwa shaye pefimbo ta patulula Olivia Nakale Primary School, omukulunhuwiliki wehongo moshitukulwa shaHangwena Isak Hamatwi okwa ti modoolopa yEenhana omwa kala mu na omhumbwe yonhele yeendodo dopedu eshi ovadali hava kala tava  nyenyeta ngeenge ounona vavo inava mona ofikola.

Hamatwi okwa ti naashi osha eta opo ouministeli wehongo u kale wa tunga ofikola ipe opo ounona tava i meendodo dopedu va kale va mona omhito yo kuya keetundi.

Okwa ti ouministeli wehongo otau lalakanene okukandula po omukundu womhumbwe yeengulufikola nokukwashipaleka kutya ovanafikola aveshe ova ya keetundi shaashi ehongo ola fimana kokaana keshe Okanamibia.

Hamatwi okwa kunghulila ovanafikola novahongifikola opo va longife nawa ofikola i kale i li pamufika muwa nokukaleka po oukoshoki efimbo keshe.

“Ohandi indile ovanangeshefa, omahangano opaumwene ile ovaleli vopapolitika opo ve  uye va yambidide ofikola ei shaashi oya pumbwa oikwafifo ya yooloka ngaashi eekompiuta nosho tuu oipumbiwa ikwao.

Okwa kunghilila ovanafikola opo ve liufe komilandu doCovi-19 opo ku keelelwa etandavelo lombuto mofikola. – fhamalwa@nepc.com.na