Home / Esiku lyOmapendafule Nuumvo Otali Ka Dhanenwa koKatima Mulilo Esiku lyOmapendafule Nuumvo Otali Ka Dhanenwa koKatima Mulilo
"WINDHOEK Oku na ashike omasiku omashona Aanamibia omayovi ya mbombolokele kondoolopa yaKatima Mulilo ndjoka yi li polwamba lwomulonga gwaZambezi muumbangalantuzilo waNamibia, elalakano oku ka dhimbulukwa nokudhana Esiku lyOmapendafule momasiku 26 Aguste nuumvo. Katima Mulilo nenge tu tye Caprivi okwa tseyika nawa omolwedhiginino lyomuthigululwakalo dhe, dhoka okuza pomasiku gemanguluko sigo okeluwa ndika omuthigululwakalo nguka ihagu lunduluka unene pakuyeleka nondoolopa oshitopolwa shilwe moshilongo. Omunashipundi gOkomitiye yOmauyelele kombinga yEdhimbuluko lyEsiku lyOmapendafule nuumvo, Wilma Deetlefs okwa tseyithile oshifo shika omasiku ga zi ko kutya aantu 10 000 sigo 12 000 okuza kiitopolwa yayooloka okwa tegelelwa ya ka kale mondoolopa ndjika. Omupresidende Hifikepunye Pohamba ota ka popitha oshigwana, omitse dhoombelewa dhaakalelipo yiilongo yayooloka oshowo omalenga nookapatashu okuza momikunda moshitopolwa shoka. Nonando oshituthi oshinene otashi ka dhimbulukilwa mondoolopa ndjoka yi li omuyelo okuya miishiindalongo yaNamibia, shika itashi yi moshipala iitopolwa yilwe okudhimbulukwa esiku ndika miitopolwa yawo, Deetlefs ta ti. Okutala kuuyamba womithigululwakalo moshitopolwa shika, iidhano yopashigwana okumwenyeka engungo lyaanashituthi otayi ka dhana onkandangala esiku ndyoka. Deetlefs ota ti oshituthidhimbuluko shonuumvo otadhi ka mwenyopala shi vulithe omvula ya zi ko, shoka sha dhanenwa kOpuwo. Esiku ndika nonando otali ka kala Olyomakaya, itapu ka kala esiku lyefudho mEtitano lya landula esiku ndika nenge mOmaandaha ga landula ko. Shi ikwatelela kOveta yOmafudho gopashigwana, esiku lyefudho otali vulu ashike okugandjwa ngele esiku lyedhimbuluko lyontumba oli li mOsoondaha. ""Esiku lyOmapendafule oli na okudhimbulukiwa. Ndika olyo esiku moka hatu dhimbulukwa nokusimaneka omapendafule goshilongo shetu ngoka ge tu tetekela nale oshowo ngoka ge li momwenyo noyi iyambela nenge ya gandja oomwenyo dhawo omolwetu tu vule okukala mombili ngaashi tayi tyapula nena,"" omunashipundi gOkomitiye yEdhimbuluko lyEsiku lyOmapendafule, Frans Kapofi ta ti. Omukwatelikomeho gOkomitiye yOpashitopolwa yi nasha nOmalongekidho, Raymond Matiti okwe shi koleke wo kutya okomitiye oya tameka nale nokuninga iigongi yayooloka yi nasha nomalongekidho goshituthi shika oshinene. Kakele ina vula okugandja omauyelele ngele opwa ningwa omalongekidho nomahangano gokugandja omeya nolusheno opo ku shilipalekwe kutya aayenda oshowo aanashituthi oya shilipalelwa omayakulo ngaka mesiku ndyoka."
Your experience on this site will be improved by allowing cookies.
