Oondima odha tameka, netemo olya yi miilonga miitopolwa yomonooli, konima Shiyenga shaNangombe ali ega dhenge pevi nawa okuza iiwike ya piti.
Oshiwike sha zi ko, Kundana okwa li a talele po aanafaalama yamwe moshitopolwa shaMusati, Ohangwena oshowo moshitopolwa shaShana.
Omapya ogendji otaga ulike ge na iilya, nonando aanafaalama yamwe opo taya tameke okukuna konima omvula ya loko mehuulilo shiwike. Kuku Magano Immanuel gwomomukunda Olupumbu, okwa ti, omasiku gokulala oga pwa ko, paife ethimbo lyokulonga.
”Ngame naanegumbo lyandje ohatu penduka po05h00 yongula, tatu umbu etemo, tse tatu zimbuka po11h00 gwongula,” ta ti ngaaka. Immanuel ta ti, ethimbo ndika olyo lyokulonga, itaya tegelele omvula yi loke sha pitilila, oshoka oya tila omapya ga yule.
“Otatu pandula, oshoka iilya yetu inayi sa komutenya yo inayi kukuta. Omvula ohayi loko okukoleka iilya yetu. Omukumo otuguna natango, kutya otuna okulokwa, okuna ethimbo natango,” Immanuel ta hokolola.
Ta ti, ombepo otayi pepe nawa, oya inekela kutya momasiku galandulako, omvula oyina okuloka nawa.
Kundana sho a li a talele po omikunda dhimwe moshitopolwa shaShana ongula yOlyomakaya aanafaalama oyendji oya li ya piti ye li momapya, yamwe otaya limi, yo yamwe otaya kunu omanga yamwe opo taya pulula. Ismael Natanael, okwa ti ina pulula natango epya lye, oshoka omvula ndjoka ya loko sigo onena, inayi mweetitha oonkondo dho kulonga. “Otandi tameke okulonga epya lyandje ngele omvula ya Febuluali ya loko. Ethimbo ndika oku za paife omvula opo hayi loko, ihe ngele omwedhi nguka ogwa piti inaayi loka ngaashi shito, nangame itandi pulula we,” Nathanael a popi ngaaka.
“Ta ti, sigo oompaka otapandula, omwiidhi ogwa mena nawa, iimuna oya paluka nawa komalutu” ta ti ngaaka.
Nathanel ta ti, natango kena uumbanda, sho inaa tameka okulonga epya lye, oshoka okwa itaala kutya, ethimbo omvula tayi ka loka nawa, ethimbo alihe, nena iilya otayi ka koka tayi ende lele.
“Ayehe mboka yatameke okulonga omapya gawo muJanuali, otuna okuka teyela iilya oshita,” ta popi nomukumo.
–vkaapanda@nepc.com.na