Home / Etotepo lyOngundu Ompe Tayi Zi moSwapo Lya Nyanwa Etotepo lyOngundu Ompe Tayi Zi moSwapo Lya Nyanwa
"TSUMEB - Omitotolombo tadhi inyenge moshigwana dhi nasha netotepo lyongundu ompe yopapolotika tayi zi mongundu yoSwapo osha talika ko ""Omashendjo gOmvula Ompe"" nokunyanwa kutya oshi li ekatukonkatu lyolutandu lyaa na ondunge kuyamwe yomiilyo yongundu tayi pangele - Swapo. Oshilyo shOngundumutima yoSwapo, Pendukeni Iivula-Ithana ota ti ewiliko lyongundu ye olya pulakena nuukeka neitulomo komapopyo ngoka ge nasha netotepo lyongundu ompe yi tule koshiyelekitho oonkondo dhongundu tayi pangele. ""Ope na eitaalo kutya ongundu yompilameno ndjoka ya kindja notayi vulu okushonga oSwapo oyi na ashike okutotwa po okuza miilyo yayo yene. Oshi li nawa, ihe inamu dhimbwa shoka sha ningilwa aaprofeti yiifundja ngaashi Ben Uulenga goCoD. Okwa li ashike e na einekelo okukutha koshipundi ongundu yoSwapo, ihe inashi ke mu endela we nawa ngaashi ta nana nondatu ngashingeyi papolotika."" Iivula-Ithana ngoka wo e li Ominista yUuyuuki naHahendeNdjayi okwa gunu iilyo yoSwapo shi nasha nomanwethomo okundjoina ongundu ndjoka inayi tseyika, ndjoka wo omalalakano gayo ga tseyika ashike kumboka kwa tegelelwa ya ninge aawiliki yayo. ""Ihe kaleni uupathi opo kaa mu longithwe, ngashingeyi otaya toto po ishewe ongundu yimwe yompilameno, naye shi ninge yoyene, inamu longithwa nando,"" osho a londodha. Omapopyo ngoka oga etitha Iivula-Ithana a nyane ongundu ndjoka ompe omanga nokuli ina tseyithila oshigwana omupopi a simana poshigongi shoka Tsumeb, omupresidende goSwapo, Sam Nujoma. Iivula-Ithana oku li wo omunashipundi gokakomitiye kaawiliki yopashigwana hoka ka pewa oshinakugwanithwa kongundu moshitopolwa Oshikoto. Omuunganeki gwongundu moshitopolwa Oshikoto, Armas Amukwiyu ota ti ewiliko lyopapolotika moshitopolwa itali ki idhidhimikila nando omapiyaganeko goohamutse-mukukutu gi idhope mopro-holama yongundu yawo. ""Onda hala oku ku shilipaleka, Omu-simanekwa Omupresidende, kutya oonkambadhala adhihe okutopagula aakwashigwana mboka taya mono iihuna, ongundu yopaudemokoli, no-kweetitha evundakano mokati kaaleli yetu yoSwapo, oon-kambadhala adhihe dhika otadhi ndopa nodha ndopa nale, oshoka Swapo oye shili oshigwana noshigwana osho Swapo. Otatu vulu okuuvaneka mpaka ngashingeyi kutya oshitopolwa Oshikoto kape na esiku nashi tote po nenge okuyambidhidha ongundu yilwe kaa yi shi ongundu yoSwapo,"" Amu-kwiyu ta ti. Mboka ye li pomuthenu gonzo dhomauyelele otaya ti oonkundathana kombinga yompito okuvuta po ongundu tayi zi moSwapo odha fofotwa omathimbo ga zi ko, niigongi iyali oya ningwa nale mOshi-koto okuthaneka onakuyiwa yongundu ndjoka. ""Tsumeb oya kala ehala moka mu na omaiyuvito go-papolotika ge li ompinge noSwapo omathimbo agehe. Kakele omitungilo adhihe miikandjohogololo ayihe (9) odhi li miikaha nekondololo lyongundu tayi pangele. Muka (muTsumeb) omo wo mon-doolopa moka mwa totelwa oCoD, ngashingeyi otaku popiwa ishewe ongundu ndjika ompe,"" osho onzo yimwe tayi ti. Oshilyo shimwe shokomi-tiye yewiliko moSwapo moshi-topolwa, shoka inashi hala edhina li tumbulwe otashi ti: ""Aatangalali mboka ye lile komeho einyengo ndika oya tseyika kewiliko lyongundu, naashoka tse twa hala okumona ya ninga okwiikutha ashike mongundu peha lyokutsa iilyo yetu omaminimini ya tonde oSwapo. Tse otatu ka ungaunga nayo ngele oya taagulula ekotampango lyongundu. Oya manguluka okuya komeho, ihe oye na okuhulitha po uuk-washilyo wetu ndele taya tsikile ihe nawa. Tse otwa kundu-kidhwa kaaleli mboka hayi iningitha ya fa aavuliki, ihe esiku otali ke ya oku ya mona mo opo tu ze moomposi moka twa tulwa twa fa ashike aagoya. Otandi ya kumike ya tseyithe pambelewa ongundu yawo, andola ye shi ninge mesiku 1 Apilili (Esiku lyOmalayi/Omashendjo). Amukwiyu ota ti: ""Tse ongiilyo yongundu yopolotika, otu na okukaleka po eiyuvo lyelalakano limwe nokuhan-gana ongoshigwana moshito-polwa nomoshilongo. Shika otashi vulu okusindana moku-kondjitha uukwamuhoko, uulin-gilingi, uukombunda, uukwa-shitopolwa nokwaanyateka omadhina gayakwetu. Mokusi-maneka omilanduveta opo ashi-ke tatu vulu okukala iilyo yolela yoSwapo oshowo aaleli yetu momitungilo dhongundu moshitopolwa ashihe."" Omupresidende gwon-gundu, Sam Nujoma okwa londodha kutya ongundu ye itayi ka pitika nando aapiya-ganeki ya yonagule ombili nengungumano ndyoka tali tyapulwa moshilongo pethimbo ndika."
Your experience on this site will be improved by allowing cookies.
