Tulo sakata itaha hakuna ni swalisano yamulelo. Kacwalo Mubusi Hage Geingob nabulelezi baeteleli babaituti mwanaha kaufela kuswalisana hamoho, nikufumana tumelelano hala lika zebakataza kuli bakone kubeleka hamoho mwamoya waHarambee. 

Harambee kilinzwi la Siswahili, leli toloka kuhohela hamoho. Geingob nabulezi manzwi awo viki yefelile kanako yakukwalula mukopanao wabu17 wakatengo kakayemela baituti kakazibahala kaNanso. 

Naize kueza cwalo kukatahisa zende mwakatengo kakayemela baituti mwanaha kaufela. 

“Mwalingambolo zaka ni babanca, nilemuhile kuli babanca baluna bautwisisa mulelo walusika lwa bona, nikuli bana ni swalisano mwalitaba zeli zabutokwa kubona, zecwale kamubu ni mandu, hamoho cwalo ni ni maino abaituti, masheleñi akulifela lituto zabona, misebezi ni kukona kuitenga mwalipisinisi, hamoho cwalo ni makete sakata,” nabulezi.

Mubusi nabulezi hape kuli muuso uitamile kuzwelapili kufa tuso yelukela kwakatengo kakayemela baituti, kakusebelisa makolo aswanela ni liofesi. 

Kwamukopano mubakweli kulikwambuyu wababanca Emma Kantema-Gaomas naize kutahisa misebezi hala babanca kusiala kuba kwabutokwa. 

“Zwelopili yababanca itokwa swalisano yatutengo kaufela. Kamukwa wakulwanisa kutokwa misebezi hala babanca, nikuli kutahisa misebezi kutokwa kuli babanca bafiwe lyano sakata,” nabulezi.

Mueteleli waNanso yana tuluha fasipula Simon Taapopi naize kuli tuto kona nzila yeo naha Namibia ikona kulwanisa butata bwa bubotana.