Mwene womukunda mupe, opo a nangekwa momukundda Oluundje okwa kunghilila ovanyasha vomomukunda waye opo va fimaneke oilonga, nokulonga nelitulemo.
Isak Hamatwi okwa ti okwa didilikwa ovanyasha vahapu itava fimaneke oilonga, vo tave i fiye po ngeenge ova mono ondjabi, voo vamwe tava kala tava faula koilonga.
Edi Hamatwi okwe di popya pefimbo kwa li ta nangekwa onga mwene womukunda Oluundje oo uli moshitukulwa shaShikoto Olomakaya.
Hamatwi ou yoo eli omukulunhuwiliki wehongo moshitukulwa shaHangwena okwa ti okwa pandula ovakalimo vomOluundje eshi va di mina opo a ninge mwene womukunda wavo mu pe.
Okwa kunghilila ovanyasha nounona opo va kale tave li tula mo moinyangadalwa yavo yofikola opo va dule okupita noitwa iwa kexulilo lomudo.
“Ovadali nava kale tava tu ounona omukumo opo veli honge noudinini osheshi ehongo ola fimana kokaana keshe. Onghee otwa pumbwa oshiwana sha longwa momukunda wetu opo shi dule okuyambula po omukunda wetu,” Hamatwi ta ti.
Okwa weda po ta ti otai indile oshiwana opo shi kale tashi longele kumwe naye nombili nokukala tashi topolafana omayelele kombinga yomukunda wavo.
Pefimbo ta popi ponhele yovanamukunda Oluundje Klaudia Nafuka okwa ti okwa pandula unene eshi paife va mona mwene vomukunda konima eshi va kale momukunda uhe na mwene.
“Paife ohatu kala a tuwa pewa omayakulo ngaashi eembapila dokushinga oimuna, oshihako shomukunda nosho tuu shaashi paife omukunda wetu owa mona mwene,” Nafuka ta ti.
Nafuka pamwe novakalimo vomukunda Oluundje ova indila mwene womukunda wavo opo a kandule po omukundu uli koundingosho Epandulo eshi kwa didilikwa ha kukala oshiwana tashi lidenge, nokulituka konima ngeenge sha longifa oikolwifa.
“Otwa hala yoo vali mwene womukunda Hamatwi opo a kandule po omukundu weendjila da fitikwa iha di endwa vali, oshoyo neenhele doulifilo woimuna yetu,” Nafuka ta ti.
Omukunda Oluundje ouna omaumbo 155 mwa kwatelwa eumbo lamwene womukunda wavo Hamatwi, nouli moshikandjohoololo shaKankolo.