• July 6th, 2020

‘Hanisika hasanya kakokwani’ … mukwaezi unyaziwa hala kakokwani


WALVIS BAY – Mukwaezi wa motikala yelonga libyana yapila kwa Walvis Bay, ili yomuñwi wabapili kuswalelwa kakokwani ka Covid-19, usweli kunyaziwa kuli kiyena yana hasanyize kakokwani. Hana bulela hala linyazo ni kushemunwa ki sicaba, mukwaezi naize manzwi amañwi anze abulelwa amulyanganisa mwa muhupulo. “Ninyaziwa kuli nihasanyize kakokwani mwa Walvis Bay, nihaike nenili mwasibaka sesi kungulezwi kwatuko kuzwelela hanikuta kuzwa mwanaha South Africa. Niutwiswa butuku kimanzwi asicaba akuninyaza kuli nitisize kakokwani ka korona mwa Walvis Bay. Fa mwanana walilimo zelishumi ni yena sa kenyizwe mwateñi. Hanina mwana wa musizana wa lilimo zelishumi mi musalaka ukwa hae.

“Nihaike mutu yabulelwa kuli neni ezize bunyazi niyena, hanimuzibi mi hanisika kopana kale ni yena,” nekubulezi mukwaezi. Libizo la hae lipatilwe kumusileleza kwa kunyaziwa hape. Bakwaezi balimotikala zelonga libyana babanze balonga nikuisa libyana zabutokwa mwanaha kaufela, bangiwa kuba batu babutokwa mwanako yakulwanisa kakokwani ka korona. Kono babañwi babanyaza nikuba sheununa inge bashimbile kakokwani. Mukwaezi ni yana beleka ni yena nebasizwe musebezi kakukulubelwa kuli nebalobile mulao wakukungulelwa kwatuko. Kono yena utiseza kuli nebalumelezwi kuya kwa panka, kwaliñaka zasipatela, nikuisa limotikala kwalibaka zamapangelo mi nebasika bulelelwa kuli baine feela mwasibaka sakukungulelwa kwatuko.

Bubeli nebakwalezwi mwalimotikala zabona kwa FP du Toit mi nebaile kwakumata haba bizwa kuli bakutele kwamusebezi. “Hane lusweli kumata mihato yesikai kuzwa kwalimotikala, nelu amuhezi pizo kuli babeleki bamakete basweli kulubata kwasibaka kone lukwalezwi. Nelukutile onafo feela kakuli neluli fakaufi,” nekubulezi mukwaezi. “Batatubi bamakete bakile balubuza kana neluile kuyo bona mabasi aluna. Nebaile ni kwalibaka zaluna kuyobuza bahabo luna, bane bailo nitifaza kuli nebasika lubona samba lukuta.” Nakupile bayahi ba Walvis Bay kuambuka kuhasanya litaba zabuhata zeutwisa butuku. Edward Shivute kuzwelela kwa kampani ya Walvis Bay Corridor Group (WBCG), naize kuna ni mihupulo yemaswe kuamana ni bakwaezi balimotikala zelonga libyana. “Nihakulicwalo, luswanela kutalima lika zeliteñi mi luna nikutahisa lika zekafukuza sheununwa kwa bakwaezi baluna,” nabulezi. 

Nakupile hape bayahi banaha Namibia kuambuka kusheununa bakwaezi balimotikala zelonga libyana. Nabulezi hape kuli bakwaezi ba tatubiwanga nako kaufela nikuli, maikuto amunahano niona atalimiwanga mi nafile mamela kuli bakona kutakana, bakeñisa kuli kuekeza fakusheununwa hababoni mabasi abona kakuli habakuta bakwalelwa. “Lulemuhe kuli bali famukwakwa kuisa litokwahalo zaluna isi kuli balata, sihulu kanako ye ya kakokwani. Kacwalo lunani kuitumela kwamusebezi obasweli kueza,” nabulezi. “Likwambuyu wa Mulao Yvonne Dausab niyena nafile mamela hala kusheununa batu babali kwa Walvis Bay, kungelela cwalo ni bakwaezi balimotikala zelonga libyana. “Limembala za sicaba basike kusheununa bayahi ba Walvis Bay, ni bakwaezi balimotikala zelonga libyana sihulu mwanako yeluli kuyona. Kusheununa kapa kuketulula batu mwanako yeluli kuyona kumaswe,” nabulezi


Eveline de Klerk
2020-06-29 08:51:34 | 7 days ago

Be the first to post a comment...