• December 13th, 2018
Login / Register

Hanse Himarwa kuna parapo vagara wokusumbapeka vanona wosure


WINDHOEK - Mukurogara ogu ana kara asi kapi gahamena kosure nye asumbapeke munona gosure hawe ogo gahepa kuyimona ntani, awo ngava vatengeka kukwama veta zopo ntambo zokuzeruka ezi zakara asi zokupopera munona pokukara kumwe panyama. Odo nonkango karuganesere ministera gerongo dina kara nye moveta zerongo, Katrina Hanse-Himarwa, ogu katente asi veta zerongo zompe, zina kutanta asi vanona mati vana kusumbapeka vanona vakwawo mosure kapi navavagusamo mosure. Ministera kalimbwilire mapuro aga gatunda koyilyo yombongarero zanavenye sivike kasipwireko mombongarero zanavenye  posiruwo oso kavaliyongere veta zerongo zina kara ngesi momaliyongo mokuzitarurura komeho vakazipulisire. Mapuro gamwe gana pumbwa kugazeresa unene mosintokorwagona 13 zomoveta muna kara asi ekeverero ntani egendeso asi munona gahagwana ezimo. Age katente asi kusumbapaka munona gonomvhura 16 ndi konhi dazo ngoso ove kuna mukwatere kononkondo mokukwama veta zokukwatera kononkondo veta zomo 2000 nomora 8 zomo 2000. Yipo asi muntu gwangoso vahepa kumurapota oku yawapera. Vahameni mombongarero zanavenye kavahere kudiva asi ngapi omu ngayiza moyirugana ntani asi yilye ngakara nosinka sokuyisikisa kwaMinistera. Age kalimbwilire asi nampili nomvhura ngapi dina lisigi, mitili nampili nakauke kapi vamupulisira akare neharo nomunona gosure, makura oyo vahepa nye kuyirugana kumwe noveta ezi zakarapo zovarugani mepangero. Nampili asi umbondo ow okapi vana ugwana asi nzo zonene nye sure zahepa kutulisapo episuro kwamitili ogo. Age katente hena asi ngendeseso zoposure, zahepa kuziwapukurura yipo zihuyunge asi nsene munona goposure vana musumbapeke. Yipo nye age kahundilire varongi, nkarapamwe, ntani vagendesi monokomitiye konosure asi vahepa kugendesa nawa nokukeverera asi pwaha kara eharo pokatji kamitili nomurongwa gwendi. Ogu ngava yigwanena asi anasumbapeke munona gosure gokonhi  nomvhura 16, ogo gahepa kuyidiva asi kuna ruganesa epuko vahepa kumukwata morwa kuna kwatere munona ogo kononkondo. Age simpe kuna kurugurura asi nsene yina horoka oyo, muntu gwangoso vahepa kumurapota oku yawapera. Mokukwama nye vanona ava vana kutambura rwauvali ndi rutatu, sintokorwa 13, mosintokorwa gona (3), kuna kutanta asi nkenye munona ogu ana kara asi kwagwana ezimo age mosure simpe ana kara nompito zokukamutambura hena mosure. Veta ezi zerongo ntani egendeso vanona wokugwana mazimo hawe ngesi yina zere nye asi ngapi navayirugana. Mokukwama mumati ogu ana kara asi munasure, mokukwama unankondo werongo lyanavenye, ehungo mwenyo ngavalitulisapo komumatigona ogo ana gava ezimo. Kumwe nokutanta asi erongo lyelike kapi taligusapo udigu wangesi. Vanona kapi vatunga velike, awo kwatunga kumwe novakurona, vareli vawo ntani monkarapamwe. Yahepa nye kukara eruganeno kumwe ose vanaveta ndi asi vatulisipo noveta womombongarero zanavenye turuganene kumwe nonkarapamwe yipo tutare asi ngapi naturugana tugusepo udigu ou wovanona vetu, yimo ngoso ana kuyahulisa.


Albertina Nakale
2018-11-15 10:07:30 28 days ago

Be the first to post a comment...