Easy access at the tip of your fingers, subscribe to our daily ePaper version of our New Era Newspaper.
Home / Iikolokosha yOpamuhoko poAminuis Ya Kundathanwa nOmupehaprimaminista
Iikolokosha yOpamuhoko poAminuis Ya Kundathanwa nOmupehaprimaminista
2006-11-10Staff Report 2 "WINDHOEK Oongundu mbali dhoka dha etitha iikolokosha omasiku ga zi ko poAminuis shi nasha neegululo lyombelewa netsiliko lyepandela etiligane odha gongala mOmaandaha nOmupehaprimaminista Dr. Libertina Amathila. Oongundu dhika dhi ikenyena komayego odha kala omutumba nOmupehaprimaminista poshigongi shomiyelo dha patwa opo dhi mu kuthile ko kombinga yomakuyunguto ngoka ga faalela wo omwenyo gomulumentu goomvula 25. Oshikumungu neso ndika oya haluka aakalimo yomoshikandjohogololo shaAminuis. Oonkundathana dhoka konyala dha kwata ethimbo lyongula ayihe mOmaandaha odha gongalwa wo kOminista yOmapangelo gOpaitopolwa, Oondoolopa, Omagumbo nOmapendulopo gOkomikunda, John Pandeni, Ominista yIinima yOpaupresidende, Albert Kawana oshowo Inspekta Omukuluntu Komufala Ndeitunga. Konima yomutumba nguka, Dr. Amathila okwa yakele ko iikundaneki kutya oshigongi okwa li sha kwatela mo oonkundathana nomakonakono. ""Ngame okwa li nda hala okuuva koongundu adhihe mbali kutya oshike naanaa sha ningwa opo ndi vule okugandja omushangwahokololo gwi ihwapo kOmupresidende ngele okwa galukile moshilongo,"" Amathila ta ti. Omupehaprimaminista ta yelitha kutya okwa lombwela koongundu adhihe kutya oshituthi shoka sheegululo lyombelewa netsiliko lyepandela otashi ka kalekwa manga. Ota ti okwa li a tseyithilwa kombinga yonkalo moshikandjohogololo shoka kutya oya shuna kuuwanawa - engungumano ano inapu lopotwa we ekuyunguto lyasha. Amathila ota ti omakonakono gOpolisi oge li metifa unene shi nasha noshipotha shedhipago nota indile oshigwana shi gandje omauyelele ge nasha noshiningwanima shokuyaha. Komufala Ndeitunga naye okwa ningi wo eindilo koshigwana shi gandje uuyelele wu nasha nedhipago. Kape na omufekelwa a tulwa miipandeko shi nasha noshipotha shedhipago, nomalundilathano oge li pokati kopolisi naakwashigwana poAminuis shi nasha naangoka a umba. Pokati mpoka aanambelewa yamwe yopolisi otaya ti oholo ndjoka ya yaha okusa omulumentu omugundjuka oya za maakalimo, omanga aakalimo yomoAminuis ye na eitaalo kutya opolisi oyo yi nasha neso lyomumati ngoka. Komufala Ndeitunga ota ti oyendji yometanga lyopolisi mboka kwa li ya tumwa koAminuis oya kuthwa ko, ihe natango ope na ashike omuyalu omushona gwaapolosi mboka taya tonatele nokutala onkalo moshitopolwa. Okwa ti opolisi oyi li uupathi pethimbo ndika, nangele opwa holoka sha otayi ka shuna mbala ngele osha pumbiwa. Oshilyo shosheendo shoka sha za koAminuis, Eddy Uandara ota ti oshigwana osha tala ko etsiliko lyepandela noshituthi sheegululo lyombelewa ongeponokelo neyugoko lyoshitopolwa shawo. Okwa yelitha kutya sho Aaherero ya thiminikwa koonkondo okuya komahala gaayehe gopamihoko pomimvo 1924, aakwaniilwa oyendji oya dhike uuhamba/oombala dhawo miitopolwa yawo. Ota ti Uuhamba waMaharero owa dhikwa moshitopolwa Otjinene, Hosea Kutako ngoka a li wo Omukwaniilwa gwAaherero okwa kala moAminuis, Kambazembi okwa kala moWaterber omanga Zeraeua a kala moshitopolwa Omaruru. ""Konima yeso lyaKutako, okwa pingenwa po kuMbaha nokonima okwa ka pingenwa po kuKavari ngoka e li natango momwenyo."" Uandara okwa li a hala okuuva kutya Ewald Kazongominja okulile po oshigwana shini ngele moshitopolwa moka ke na mo aalanduli/aalelwa. ""Ngele okwa ulikwa kuMaharero na ka egulule ombelewa ye nokutsilika epandelo lye kOtjinene."" Uandara okwa ti Elelo lyOpamuthigululwakalo lyaMaharero nonando olya taambiwa ko kepangelo lyaNamibia, kali na uuthemba okulenga ""omalenga gawo"" miitopolwa ayihe moshilongo ngaashi ya hala. Oshifo shika osha kundana wo kutya omakwatathano gopangodhi gaKazongominja itaga longo konima sho oongodhi dha tetwa ko niimuna ye yimwe ya dhipagwa. Kakele oshifo inashi vula okukoleka iiningwanima mbika paumwene." 2006-11-10Staff Report 2
