New Era Newspaper

New Era Epaper
Icon Collap
...
Home / Iipotha yi vule 350 ya lopotwa moomwedhi ndatu oshilongo ashihe

Iipotha yi vule 350 ya lopotwa moomwedhi ndatu oshilongo ashihe

2022-05-11  Victoria Kaapanda

Iipotha yi vule 350 ya lopotwa moomwedhi ndatu oshilongo ashihe

Sho uupyakandhi womakwato koonkondo tau tsikile moshilongo ashihe, okwa ndhindhilikwa iipotha tayi indjipala kehe esiku.

Opolisi yaNamibia oya pititha iipotha yi vule 346 ya lopotwa muule woomwedhi ndatu.

Iipotha yomakwato koonkondo yi li 131 oya lopotwa muJanuali omo amuke, niipotha yi li 95 oya lopotwa muFebuluali omanga yi li 120 ya lopotwa muMaalitsa nuumvo.

Konima yoomwendhi ndhoka natango opolisi miitopolwa ya yooloka oya kala tayi lopota omakwato koonkondo moka kwa ndhindhilikwa taga indjipala unene maalumuntu.

Oshifokundaneki shika sho kwa li sha yi moonkundathana nelenga enene lyUukwambi Herman Ndilimani Iipumbu okwa ti, omakwato koonkondo gaalumentu oga kala haga kandulwa po.

‘’Uuna kwa ndhindhilikwa kutya oku na omulumentu a hala okuya naalumentu aakwawo miihulo, oha fikwa nondjela ompyu momatako, opo uupyakadhi mboka wu ze mo muye,” ta fatulula ngaaka.

Ta gwedha po ta ti, shoka sha kala tashi lopotwa kiikundaneki, yaalumentu taya kwata aalumentu aakwawo koonkondo nenge aanonamati, onda inekela kutya oyendji oya pula.

“Yamwe anuwa ohaya lombwelwa koonamunganga kutya ngele oya yi miihulo naanona aashona ayihe otayi ke ya endela nawa,” Iipumbu ta ti ngaaka.

Omunambelewa gwonkalo nawa negameno lyaanona, ta ungaunga niinima ya pamba omahepeko Veronica Rose Theron, okwa fatulula kutya iipotha yekwatokoonkondo oya londa noonkondo oshoka ehepeko ndika olya talika ko onga oshinima shomonkalamwenyo nokashi na uupyakadhi.

“Ekwato koonkondo oshinima shoka hashi vulu okuyonagula onkalamwenyo yomuntu momikalo dha yooloka. Oyendji kayu uvite ko kutya ekwato koonkondo oshike,” ta fatulula ngaaka.

Ta ti, ekwato koonkondo, uuna omuntu ta kondjithwa panyengo lyokolutu, no inapu pimbiwa pa kale okuya miihulo.

“Ngele wa ikuthile oveta okunyenga omuntu kiilyo yolutu yopaumwene kaashi li pahalo lye, ngaaka owa kwata omuntu koonkondo, owa longitha oonkondo dhoye okuninga shoka wa hala,” ta hokolola ngaaka.

Ta ti, ekwatokoonkondo kali na kutya omupambele gwoye, omusamane nenge omukulukadhi gwoye, kehe gumwe ti ikuthile oompango okukondjithila omuntu miihulo nenge te ku nyenge kiilyo yopaumwene, okwa kwata koonkondo.

“Onda ndhindhilike kutya ekwato koonkondo ohali holoka molwa okwasimaneka aakiintu, elongitho lyoonkondo lyapitilila oshowo omahepako,” Theron ta fatulula ngaaka.

Ta ti, ayihe mbyoka okwa li e yi fatulula sha ikolela kokatendo kokukondjitha omakwatokoonkondo, oka-8 komomumvo 2000.

– vkaapanda@nepc.com.na


2022-05-11  Victoria Kaapanda

Share on social media