• September 24th, 2020

Kakokwani kahasana mwatolongo


WINDOKO – Kuekezeha kwanombolo yababaswalezwi kakokwani ka Korona kwa tolongo yetuna mwa Windoko kutisize tiyeho yamizeko. Viki yefelile khuta ye nyinyani neisize kwapili buñata bwa mizeko, babanyazwa babali mwasitokisi basiyo bakeñisa kubihiwa kwa kuambalakana kwa kakokwani mwa sitokisi. Yomuhulu wa litolongo mwanaha Raphael Hamunyela naize mapantiti babafitelela mwanda base baswalezwi kakokwani ka Korona. Kacwalo buñata bwa mapantiti habalumelelwi kusiya sitokisi kuyobonahala mwa khuta.

Wo ki omuñwi wa milao ye lukisizwe mwa kutibela kuambalakana kwa kakokwani mwa sitokisi. Hamunyela naekelize kuli mapantiti baba swalezwi kakokwani ka Korona, babeilwe mwa mizuzu yeshelana. “Lupatehile kutatuba kabuñata kwa sitokisi ni kubata bane babile bukaufi ni baba swalezwi kakokwani, ili kuli lukone kuziba babana ni kakokwani ni babasina. Lusweli kulika katata kutibela kuambalakana. Hakutusi sesiñwi haluzamaya zamaya ni mapantiti,” nekutalusize Hamunyela. Kanako yacwale mapantiti haba lumelelwi kupotelwa, hamocwalo ni kubona bayemeli babona.

 “Kanako yacwale halu lumeleli bapoti kwa sitokisi. Lueza cwalo kuli lusike feela kusileleza mapantiti kono lusileleze sicaba kabupala,” nekubulezi Hamunyela. Sibuabui wa ofesi ya likhuta Ockert Jansen natolokile kuli ofesi yebona zalitolongo mwanaha ikandekisani ni yomuhulu wa bazekisi hala baba swalezwi kakokwani kwa sitokisi. “Kamukwaocwalo kakuba katengo kakana ni buikalabelo lulumelelana ni ofesi yebona zalitolongo, mi mizeko yababali mwa sitokisi ikana iiswa kwapili. Ki kwabutokwa kulemuha kuli twaniso ya Covid-19 ikwaniswe, maofesi kaufela ana ni kubeleka hahomo,” nekubulezi Jansen.


Maria Amakali
2020-08-31 11:02:39 | 23 days ago

Be the first to post a comment...

You might also like...