Walvisbay - Ogu kakere kuna kumukunga unene vaporosi wosipesiyare, kontabel gomuporosi Herman Abed, gonomvhura 31, ogu vana kugazareraasi karoyere nouta mukadona gwendi gwanare nouta wokoyirugana yendi moWalvisBay, sivike kasipwire morwa yimaliwa yokusika koN$900 age kakamonekere rokuhova nkera kompanguro modoropa zaBaye. Abed ogu kakere asi sikondovike nasinye modorongo, age kavamukwete moune siruwo sooso kaligeve mwene kovaholi zendi posasiyona zoozo aruganene, konyima tupu zokuroya mukadona gwendi gwanare Selma Uupindi.
Gonomvhura 22 ngesi kuna kugwana uhaku mosipangero moVenduka. Abed kuna kuzuvhika asi karoyere Uupindi, yikando yitatu mo Tornyn Geserit street morukanda rwaKuisebmund konyima tupu apa kahundilire asi vamupe yimaliwa yendi yokusika koN$900 yitunde komukadona konyima tupu apa kahagekesere eharo lyawo eli vakara nalyo nomvhura ntatu. Mugazarerwa ogu katanterere mupanguli asi age nakapapara ahende gwamwene aya mukarerepo, nokuhundira asi ana pumbwa yivike yitatu yipo agwane mukarelipo poyipangura. Ogun ye kakarerepo epangero kapi katambwire asi muntu ogu vamupe mpito alifutiremo morwa oyo ana rugana yidona unene ntani kuvhura aka zonagwise makonakono aga navakarugana vaporosi. Age kapi nye kavamupere alifutiremo ano mpanguro zendi kavazirundwilire dogoro mwaNovember 5. Nye age simpe kavamupere mpito asi kuvhura aturemo ehundiro lyokulifutira kukwama nongendeseso. Apa kahuyungire nkera kosayitunga zaNew Era, mosipangero moVenduka, Uupindi katente asi kamuroyere mumati gwendi gwanare morwa yimaliwa yokusika koN$900, eyi ana kuhundira morwa kuhagekesa eharo eli kehagero lyokwedi kuna puko.
Age katente asi katamekere kumuhepaka mokwedi kwaJune mvura zeezi, makura age yipo gatokora asi vahepa kuhageka eharo lyawo. Simpe kagwedereko asi age kwatameka moutatu kumutantera asi nsene kapi nafuta yimaliwa yendi tamuroya, nsene kapi ana hara kumuroya gahepa kufuta yimaliwa yokusika ko N$900. Yimaliwa eyi kuna kara asi koyili gamuranderere posiruwo oso awo simpe kumwe vana kara meharo.
Agekakatuliremo erapoto lyokumurugana momudona ntani kumuswaura moune kongurangura, komeho aka kare nye mehudi lyokumuroya. Age pomuhowo kapi gahere asi akapaturure sirapotwa morwa vaporosi kwahere asi ngano vavagwana vavali owo vavahuyungise. Age kwanyokere kuhuyunga name makura tapwaga asige nge mosasiyona,makura opo yipo nye natuliremo sirapotwa. Mokukwama kwendi Abed ezuva nalinye kwaruganesere nonakango dokutjilisa. Karoyerenge poopo tupu nakutunda mehauto lyovaporosi ntani taroya hena rwauvali siruwo oso ama kuna kuduka sautatu karoyerenge ame ninaliganda pevhu”. Yimo ana kutanta Uupindi yimo ngoso ana kutanta. Nokutanta asi awo kwakara meharo eli nomvhura ntatu dogoro papa nye eharo lyawo kalihege. Ame kanimusigire paapa katanterere nge asi age ana kara nomunonagomukadona ogu garetesa komukadona peke moSwakopmund,nye age kapi kayitambwireko asi ame kapi nina muhara hena.’’ Yimo ana kutanta Uupindi.