WINDOKO – Katulo mwataba yeo mubatisisi yomuhulu mwa ofesi yelwanisa litaba za bulyangelino ili yezibahala ka ACC Phelem Masule, ya zekisa Ngambela Saara Kuugongelwa-Amadhila hala kulundulwa fasitulo sa litaba za kubatisisa ni kuzekisa, mazazinyana amano huliswa ika fiwa la 28 Muimunene. Zeo nelipatuluzwi ki muatuli swalelele mwa Khuta Yepahami ya Windoko Eileen Rakow, kasamulaho akuutwa likangisano kwamaneku amabeli, Dennis Khama ni Ramon Maasdorp. Khama uyemela Masule kataelo ya Shakwa Nyambe, mi Maasdorp uyemela babana ni kuikalabela. Masule nahulisizwe kasamulaho akelezo kuzwelela kwa katengo kaka bona za misebezi ya sicaba. 

Kono mazazinyana Kuugongelwa-Amadhila abeela kwatuko kuhuliswa kwahae. Kanako ya cwale Masule ubata kuli Khuta Yepahami imukutiseze fasitulo lipatisiso halizwelapili. Babaikalabela babulela kuli taba itisizwe mwakhuta yesalukeli, nikuli kitaba yeswanela kuya mwa khuta yebona zalikomano za misebezi. Maasdorp ubulela kuli taba iama komano mwahala mubeleki ni mubelekisi, kacwalo iswanela kuiswa kwa khuta yebona zalikomano za misebezi. Mwakulwanisa taba yeo Khama naize taba kiya mutomupuso wanaha kakuli italima buiketelo bwa ngambela, bwa kulundula Masule famusebezi kakusebelisa maata afilwe, kakuli usa sweli kueza lipatisiso hala mafosisa ane abile teñi.