New Era Newspaper

New Era Epaper
Icon Collap
...
Home / Keto yamakwambuyu itokwisa Geingob buloko

Keto yamakwambuyu itokwisa Geingob buloko

2020-03-23  Albertina Nakale

Keto yamakwambuyu itokwisa Geingob buloko

WINDOKO – Mueteleli wanaha Hage Geingob ubonisize kuli hana kuketa limembala zalikopano zelwanisana hala makwambuyu bahae, mi kanako yeswana napatuluzi kuli kumubela tata kuketa baeteleli balilimo liketalizoho zetaha. Nihakulicwalo Geingob viki yefelile nakutiselize falitulo Nangolo Mbumba kuba mubakweli wahae, Saara Kuugongelwa-Amadhila kuba ngambela, ni likwambuyu walitaba zakwanda naha Netumbo Nandi-Ndaitwah kuba mubakweli ku ngambela. Geingob nakonkiselizwe kuba mueteleli wanaha lwabubeli nilwa mafelelezo Lasabata, mi hane abuzizwe kibabihi bamakande nabonisize kuli hana kuketa balwanisi bahae. 

“Haiba nolwanela kunitula, mi nakutula. Cwale fa niswanela kukubatela sibaka? Kana kona mukwa sakata omunca mwanaha Namibia? Kiñi hane lusinyize masheleñi aluna ni nako yaluna kutula mutu yomuñwi,” neku bifile Geingob. “Hane nisweli kubabaza, nosiyo. Neli kufufulelwa. Kacwalo, kiñi haniswanela kubulelelwa kuli nikete balwanisi? Kasamulaho akubabaza nikukutula, cwale fa sobata kabelo nina.” Kalishea Geingob nakile ataluseza babihi bamakande kuli bayahi babañwi banaha nebabata kuli akete Dr Panduleni Itula nimulwaneli wababanca Job Amupanda hala makwambuyu bahae. Itula nakile aba muipapati yaikemezi mwaliketisa zañohola. Nakile afumana lipenseti zebato eza zemashumi amalalu, hakubapanywa ni 56% yana fumani Geingob. 

Mueteli wanaha naize kukutisezwa mwalitulo kwabaetapili babalalu, nekutile kakuli basebelelelize naha nikopano katata, kono naekelize kuli haboni buloko mwakuketa makwambuyu.“Kimusebezi otata, nilakaleza kuli kabe muinzi mwamayemo aka, hakubunolo. Nikatazwa kisikobioti, fokuñwi nizuha kanako ya 04h00, watalima talima nikubeela kwatuko. Kutata, kuzwafo wakala kubuza babañwi. Nabulezi hape kuli kopano ya Swapo isweli kuluta babanca kuli kwapili babuse naha. “Mueteleli Nujoma neli yomunca halwanela naha ye, nina nenili yomunca. Nenibile ngambela wanaha nina nililimo ze 48 kasamulaho akunyanda,” Geingob nasupile Pohamba Shifeta, Kuugongelwa-Amadhila, yanali likwambuyu wamulalo Sacky Shangala ni Peya Mushelenga kuba hala baetapili bane balutilwe bueteleli. 

Geingob naize mubakweli wahae uka fiwa musebezi wakuetelela liswanelo zasicaba, mokuiputezi tikanelelo yabaana ni basali, kufelisa bunjebwe ni pabalelo yasicaba. Maluko amabeli akopanyizwe mi akana abiha kwaofesi yamubakweli wanaha, mwaofesi ya Mueteleli. Ngambela hala zeñwi ukana aetelela misebezi yamuuso Mwandu ya Milao, hamoho cwalo nikuswalisana ni katengo kamakwambuyu nibabeleki basicaba. “Ubona kuli litumelelano zakatengo kamakwambuyu zatalelezwa, mi hape ubona kuli kamaiso yamusebezi yaezahala. Ngambela hape ukona kueza misebezi yafiwa ki Mueteleli wanaha kapa Mubakweli. “Mubakweli ngambela uka bakwela ngambela mwalitaba zetokwa putako, sihulu hala silelezo, tukiso, kalabelo ni zusuluso. Mubakweli ngambela hape ulibelelwa kufiwa situlo sabukwambuyu.


2020-03-23  Albertina Nakale

Tags: Khomas
Share on social media