WINDOKO – Linanga lelituna halinze lizwelapili sikiliti sa Zambezi sitalimani nikuekezeha kwalikomano hala batu ni lifolofolo, mi litou likamaela mutakafululele linze libata mezi ni lico, kuli mane litisa nyewanyewa mwamahae. Kuekezeha kwalitou kukonwa kutiswa hape kipukelezo yalifolofolo zanaheñi yeliteñi hala linaha za Botswana, Namibia, Zambia, Zimbabwe ni Angola. Mi sina hakuzibwa kuli buñata bwa litou mwanaha Namibia lizwa mwalinaha zeli bukaufi, linzila zalifolofolo kwamiseto yalinaha libonahala kuli lika imulula kuñatafala kwalifolofolo mwalinaha molizwa. Mubusisi wasikiliti sa Zambezi Lawrence Sampofu nanitifalize viki yefelile zakuekezeha kwanombolo yalitou, mi naize linze liambalakana sikiliti kaufela.
“Komano hala batu ni lifolofolo kiyetuna. Buñata bwa litou lisweli kuzamaya mwasikiliti, linze litisa nyewanyewa. Mi selulatehezwi kibatu bababeli. Mutu yomuñwi nabulailwe kitou mwasilalanda sa Linyanti, mi yomuñwi nabulailwe mwasilalanda sa Judea Lyabboloma,” nekubulezi Sampofu. Nabulezi hape kuli litou linze lizamaya hahulu libata mezi. Nakupile hape sicaba sa Zambezi kuli batone nako kaufela, kuamana ni lifolofolo zesituhu ze, sihulu batu babazamaya busihu. Hana buzizwe kuli muuso usweli kuezañi kuamana ni lifolofolo, Sampofu naize muuso hakuna zeñata zokona kueza. “Liluko la Silalanda ni Bupoti hakuna zelikona kueza. Litou linze lizamaya. Lisweli kututa,” nabulezi.
Cwalecwale liluko la silalanda nelikile layo pulusa batu basilalanda sa Daures, ili babapila mwasabo yakuekezeha kwalitou linze libata mezi ni lico. Mwasikiliti sa Erongo buñata bwa libaka zamaino abatu lihapa litou zamwalihalaupa, mi maino abatu hato kopana ni alifolofolo kutaha nyewanyewa. Taba yeñwi yetisanga nyewanyewa kikukopanela mezi hala batu ni lifolofolo. Liluko liboni kuli kuswanela kufumaneha tatululo. Likwambuyu waliluko la silalanda Pohamba Shifeta kanako yakutabela lizazi la lifolofolo zanaheñi, nakile atambeka libaka zamezi kwasicaba, liluko halinze litusa sicaba sesi talimani nibutata bwa kutokwa mezi. Naize liluko nelingile lizazi kuba lakulemuha linzila zakukona kufelisa likomano hala batu ni lifolofolo zanaheñi, ili kuli kube nibupilo sakata nikulwanisa bunjebwe.