New Era Newspaper

New Era Epaper
Icon Collap
...
Home / Kutunda koupolitika ntani uholi nye wahanaudumba

Kutunda koupolitika ntani uholi nye wahanaudumba

2016-12-05  Staff Report 2

Kutunda koupolitika ntani uholi nye wahanaudumba
Kuna kara yomutaro nsene vantu owo kwakere vaholi wovanene nye ntaantani ngesi hawe monomutangu nye vanakara. Mukaro ogu kuna kara tupu nye nonyuku dongandi pokatji kaMcHenry Venaani naVinsent Kanyetu, kwakere vaholi omu vagusa mbunga zawo momayendo morwa kwaruganene kumwe. Awo kwalipakerere kumwe mokutara asi ngapi navagusamo Kaura moumpitisili wombunga ezi zaDTA, awo yavatompokere dogoro tavayagendesa kombunga zawo vahamene momahoroworo aga vagendesere nawa mvhura zina puko. Eyi kwatwarederere dogoro mbunga ezi zaDTA, ziyakare asi zopaveta paupatanesi. Nye Venaani kumwe naKanyetu hawe ngesi vana tundu nye mouholi vana kara nye noncore mokaruwo tupu aka validivire. Venaani kuna kara asi age mudivi goupolitika posiruwo santani mouzuni ntani gakara nononkwami dendi morwa omu auyunga tupu kovantu. Nye Kanyetu pwamwene, muntu ogu nomona asi gahepa kuhamena goge, nsene asi ono heap ogwane vantu wokulikarera. Age kwakara noudivi mokugwana vantu ava vatunga monomukunda, unene vahorowoli ano age gakere asi kutambura nkenye eyi ana kureta Venaani. Vantu kuna kuyimona asi eruganeno kumwe lyovantu ava vavali hawe kuyivapandwira, Venaani muuyungi gomunene ano Kanyetu murugani gomunene. Mosiruwo nye sina vapaparer mavangio hawe Venaani naKanyetu kwapapagwire vanapolitika wovakurona Kaura naMoongo. Venaani tagusa evango lyoupresidente ano Kanyetu lyouhamutjangantoni wombunga zaDTA. Kanyetu kwatundire mokukara asi muwapayiki gwaDTA, momukunda Kavango ayagwene evanogo eli lyouhamutjangantoni. Moomu tupu vatanta vakurona asi wahatuka oku ono kutunda tuka oku ono kuza. Yininke yoyiwa nkenye apa kukara nehagero. Nayina ngesi utjotji una karapo nsene asi totumbura madina govantu ava vavali. Kutunda tupu nye apa vamuhagekesa Kanyetu yipo nye gatameka kutumbura Venaani madina gokulisiga siga,nokububura asi mo2005, Venaani hambara akalipakerere kombunga mpangeli zaSWAPO, Venaani omu garuganesa yimaliva yaDTA mepuko, nomu nye gakumbagerere vantu vapilire kuyidiva asi age yige gelike gokuvhura kupindura mbunga ezi zaDTA. Venaani makura age yiyo kalimbwilire asi ame kapi nina hara kutoona muntu ogu ana kara nare asi analiganda. Kanyetu age asi kwareta Venaani ayalye masini nousi,ano mukwawo zendi nage Venaani asi yige gayirugana arête Kanyetu atunde koRundu ayamone koWindhoek, opo vamupere evango lyouhamutjangantoni. Eyi kwatamekere tupu paapa Venaani vamuganesere asi yigenye mpitisili zopoveta mombongarero zanavenye nokugwana mberewa ketungo lyombongarero zanavnye asige Kanyetu komberewa zawo zaDTA zakara koAusspanplatz, oku mukwawo ngayingire. Kanyetu kwamutaba elikwamo lyokurandesa mberewa zaDTA, zomoRundu, gahana kupurako nompitisili nonkwawo eyi yaninkisa Venaani ahanduke nokutura etokoro kwamuholi zendi. Ano Kanyetu simpe kuna parapo asi age kapi garugana epuko, nye nonyara nadinye kuna tamba mwendi asi kwarugana epuko. Vamwe kuna kutanta asi mokulipakererera naKanyetu hawe yamuvatera Venaani. Kasi kare simwe sosidigu kwaVenaaani. Ngano kapi kavatokwere ngoso hawe ngano yina moneka asi mbunga zawo kuna kuvatera umbondo. Oyo ngano nayigavanye efano lyedona. Ngapi ngano omu ngatukapangera sirongoezuva limwe nsene asi kapi tuna kupopera eyi tuna weke paupolitika. Yimo ana kutanta gumwe gwawo. Vahameni vaKaura ngesi awo kuna kuzora nye paapa vavhulira, mokutara asi vamatigona ava valipakerere kumwe vamuguseko ngesi kapi vana kulizuvha hena. Apa nye vamuhagekesa Kanyetu kazire ure nokuuyunga asi Kaura mouhunga gakere, apa gatente asi Venaani simpe munona akare asi president gombunga zaDTA. Vamwe vahameni vawo kuna kukanderera asi marwanambo aga gavavali gahareta dogoro yiyagume mbunga politika zawo momunene monomvhura odo dina kuwizako.
2016-12-05  Staff Report 2

Tags: Khomas
Share on social media