New Era Newspaper

New Era Epaper
Icon Collap
...
Home / Kwato Kuhaga, Epongo Lya Nantu

Kwato Kuhaga, Epongo Lya Nantu

2006-08-24  Staff Report 2

Kwato Kuhaga, Epongo Lya Nantu
"Hamutjanga ntoni gwa Nantu, (Namibia National Teachers Union) Miriam Hamutenya kaperepo asi erongikido lyepongo lya Nantu eli lina kutwima ngesi kapi talihaga kuna kuza ngorooro komeho dogoro ngava kaponge nampili ngomu kuna kara matjiliso govantu wokulikarera. Apa kauyungire kosayitunga za New Era momandaha ganapu, Hamutenya katente asi mberewa zendi zina divako yuma komatjiliso aga vana kurugana vantu asi awo ngava za kepongo eli nampili kapi vavazigida yipo vaka zonagwise ngendeseso zepongo. Vantu ava kuna kugenda sirongo nasinye nokutantera vantu yimpempa nomatjiliso asi ngava karugana yininke yoyidona pepongo olyo. Hamutjanga ntoni kaperepo asi woowo vazigida nava vana kuyakererapo mukunda velike ngava hwilira monda. Simpe katente asi mberewa zendi zina divako yuma asi koveli vamwe vana kupapara mpito asi vaturemo epiro ehuguvaro movampitisili ava vana karamo ngesi vaNantu yipo ngava kagendese epongo eli.Ose kwakara nombunga zovalirongi kapi tatu tarerere umbondo wangoso. Hamutenya simpe kahundilire owo vana kara noyimpempa vayihageke yipo vavasige nombili vature epongo lyawo vahorowore nompitisili edi vana hara. Ose kwakara nombunga zoudemokoli yipo nye asi tuna hara nayinye yiwape moomu twayiwapayika pwahana matjiliso. Hamutenya simpe tagwedako asi mokutura asi ngendeseso zetu ziwape vanayipundi vaNantu mono mukunda horowero nadinye 13 ngava yakara vatareli mahoroworo. Simpe yiyo katupere asi kuna kundindira vantu wokusika ko 355 vana kutunda konomukunda horowero nadinye 13 ava ngava yakara pepongo eli epongongali tameka mwa Siwogedi 28, kevango eli ava lirongere umitili moRundu. Epongo eli ngali kara lyomazuva gatatu ngali hagamo 30, ano ngali paturura paveta Ministera gerongo gekuto Nangolo Mbumba. Siturwapo somvhura ezi sepongo lya Nantu: LyoNtantatu kuna kara: ""Erongo lyomulyo ntani edeuro lyopa ekonomi yipo tuli ture mekuliko.'' Ano siturwapogona kuna kara: 'Gwanekedesa vamitili ove kuna rora meho zo 2030. Hamutenya katente asi epongo lyanamvho mulyo unene morwa kuna kuyatara eyi varugana monomvhura edi dapita, nokuyagavako hena magano gamwe asi ngano ngapi navaze komeho. Age ana hafa mokutara eyi garugana, Nantu kwa wiza pontambo zongwa kosili siruwo ngakere tupu noyimaliwa yina siki ko N$ 93,00 kombanga, ano neina ngesi tuna kara hambara nomiliyuna ntazimwe kuturako eyi tuna weke. Age katente asi nampili ngomu apa kara mali sigo pagano Nantu simpe kura kara noukumwe. Age katente asi maudigu aga vana kara nago kuna kara asi erongo miusinke tuna kara nalyo unene ponosure depangero, ntani epiro lyovarongi vadeura nawa-nawa. Ntani eli turomo lya Nantu agwane yimaliwa.Age katente asi uwa naunye owo kuvhura kuwiza nsene asi epongo eli lyakuwiza tali kahorowora nompitisili douhunga. Nampili ngoso Nam-mic mbunga zimwe azi rugana noyimaliwa kazigeve yimaliwa yina siki ko N$275 453 kwa Nantu ali kandwiseko koyitundwamo yendi yepongo eli lina kuwiza. Yimaliwa oyo kuna kara ngesi N$225 453 ozo komisi ano ezi N$50 000 nsonso, Nam-mic, Walter Don, katente asi nombunga edi dahamena kehameno lyenene kuwapa morwa awo kukondjera nzambi zovarugani. Nam-mic kugwana nsonso morwa yige agendesa mukuli nsene asi murongi tagusa makongo. Ano Nam-mic age kufuta nsonso zongandi kwaNantu."
2006-08-24  Staff Report 2

Tags: Khomas
Share on social media