Home / LAC Otayi Indile Omahala gEgameno lyOohanona LAC Otayi Indile Omahala gEgameno lyOohanona
"WINDHOEK Ehangano lyomakwatho gwopaveta moNamibia - (Legal Assistance Centre-LAC) otali ti Namibia oku na okutota po omahala gegameno lyoohanona mpoka tamu ningi hapu tulwa nokusilwa oshimpwiyu oohanona dhoka inadhi halika ongomukalo okuya moshipala uupyakadhi woohanona tadhi ekelwahi nokudhipagwa. Nonando omiyalu itadhi ulike kutya omukundu nguka ogwa lunda nenge gwa shuna pevi, Ondaama yIilonga yOkudhinda Omeya poGammans mOvenduka otayi tengeneke kutya muApilili uumudhimba woohanona 13 ohawi itsuwa omwedhi kehe monyata yokuundjugo pehala mpoka. Omvula ya zi ko, opwa lopotwa iiningwanima mbika yi li 23 yomakuthomo gwomapunda pauyelele womayalulo gopolisi. Dianne Hubbard, Omuunganeki gOmapekapeko gUukakwashike-ko-kantu nOmuviyauki gOprojeka ndjoka yi nasha nokukeelela edhipago nokweekelahi oohanona ota ti onkatu ndjoka yi na okukatukwa otayi ka kwatela mo omalunduluko momutungilo gwooveta dhoshilongo. Shika otashi ka ningwa andola opo kushilipalekwe kutya aavali mboka taya ka thiga oohanona dhawo pomahala ga tothwa mo ngaashi iipangelo itaya ka pangulilwa egeelo lyokweekelahi oluvalo. Omalundululo galwe ga simana ngoka taga thanekwa moveta otaga ka gandja ompito yuuthemba wokutela paveta oohanona kaavali mboka ye na ohokwe oshowo kutya aanona itaya ka tekulwa we ashike ngaaka okuninga shila pe na omishangwahokololo dhopolisi dhi nasha nekano lyaanona tadhi konakonwa. Iinima mbyoka yi na okutulwa miilonga shi nasha noonkatu dhoka nadhi kwatele mo Oveta yEsiloshisho nEgameno lyAanona ndjoka ya tegelelwa,"" oLAC tayi ti. Hubbard ota ti nonando okweekelahi koohanona nekuthomo lyomala oyi li etaaguluko lyoveta, iinima mbika iyali natango oyi li eihololo lyomalilagano okukonga ekwatho unene koomeme mboka opo taya pulumutha oshikando shotango mboka ye wete kutya otaya ka gwililwa po kiimpwiyu shopauvali. Pauyelele womapulapulo ga ningwa moNooli yaNamibia shi nasha nokweekelahi oohanona, uumbanda wengwanyagulo kaavali naaholike yawo, okwaanontseyo yesiloshisho nuuteku, uumbanda wokukala noHIV kaakiintu kutya aanona yawo otashi vulika wo ya kwatwa kombuto nokusa, oshowo uumbanda wokuthiga po osikola ogo gamwe gomomatompelo gokweekelahi oohanona. LAC otayi popile nokukumika oonkatu dhokukeelela omategelelo inaga longekidhwa, okugandja omauyelele kombinga yekuthomo lyomapunda paveta, okugandja eyambidhidho lyaa na epangulo kaakiintu ye li momategelelo nokuhwahwameka iikonga negandjo lyomauyelele koomeme aasimba. Oonkatu dhilwe tadhi vulu okushunitha pevi ombepo yokweekelahi oohanona nekuthomo lyomala odha kwatela mo ekumiko lyomukalo gokutekula aanona kaavali yalwe oshowo omalongekidho gesiloshisho, etalululo lyomilanduveta dhi nasha nomategelelo mokati kaakadhona ye li mosikola oshowo ekumiko lyaamatyona naalumentu ya kuthe ko oshinakugwanithwa shesiloshisho lyaanona yawo, oLAC tayi ti. Moompito odhindji, oshigwana otashi gandja ashike ombedhi kaakadhona mboka haya ningi omategelelo, kakele Hubbard ota ti aakiintu ye li momategelelo mwa kwatelwa aakadhona oya pumbwa eyambidhidho enene molwaashoka etegelelo otashi vulika lya ya mo papuko, endopo lyiingambekithi yoluvalo, a pewa etegelelo komatha nenge a kwatwa onkonga. ""Kakele shampa ashike etegelelo lya yi mo, omukiintu ngoka e li pokuninga meme okwa pumbwa eyambidhidho enene okuza moshigwana pehala lyomukalo gwokugandja ombedhi,"" osho Hubbard ta ti nokugwedha po kutya nee etegelelo olya ya mo nomukalo guni, ohanona ndjoka tayi ka valwa ko itayi pewa nando ombedhi noya pumbwa okutameka onkalamwenyo pamukalo gu li nawa ngaashi tashi vulika. Oshikumungu shokweekelahi oohanona okwa li sha kundathanwa muule mOmutumba gwOpashigwana omvula ya zi ko, nokutumwa kOkomitiye yOonzo dhOpantu, Onkalathano nOmapendulopo gOshigwana, ndjoka ya etele po edhiladhilo lyiigongi yomoshigwana muApilili nuumvo okugandja omaiyuvito gasho. "
Your experience on this site will be improved by allowing cookies.
