WINDOKO – Muzamaisi Yomuhulu wa Liluko la Njimo Percy Misika, ubulela kuli kukala kwa tekiso ya likomu zebulawa kwa libulaelo la Katima Mulilo, kuka konisa balimi balikomu kulekisa likomu zabona kwa libulaelo. Ili kalulo ye kabakonisa kufumana masheleñi hala kulekisa likomu zabona, ili taba yeka imulula mayemo abupilo bwa bona. Kampani yebona zatekiso ya nama, ili ye zibahala ka Zamco, nekwaluzi libulaelo lene lisebeliswa sapili ki kampani ya Meatco. Pulao ya pili kasamulao akukwalwa kwa libulaelo lilimo liketalizoho zefelile, nebile teñi la 29 Muimunene 2020. Kampani ye luilwe kibalimi mwa sikiliti, ilibelezwi kunanula mayemo asifumu mwasikiliti. Naize kukala kwa tekisano kukatisa cwalo ni misebezi. “Kukafukuza hape nikufela kwabucwañi mwalibaka za mafulelo, ili taba ye katisa pabalelo sakata ya mafulisezo,” nabulezi. Balimi mwa sikiliti sa Zambezi kanako yetelele neba nyanda kulekisa likomu zabona, kuzwelela kampani ya Meatco haikwala.

Natolokile kuli kukala kubulaya likomu kimulelo wa liluko, wakubata kuzwiseza pata misika yalikomu mwanaha. Misika naize libulaelo likona kunga likomu ze 110 kazazi, mi likomu ze 1 320 likona kubulawa teñi mwa kweli, ni zelikana 15 000 mwasilimo. Kalulo yeo itekezwi kuekeza kubateñi kwanama mwasikiliti. Hala kalabelo yabalimi kwa kukwalulwa kwa libulaelo, naize mulelo uamuhezwi kibalimi mwasikiliti, kakuli nolibelezwi kanako yetelele.