Home / Likomu zeneuzwizwe lizofumaniwa mwa Zambia Likomu zeneuzwizwe lizofumaniwa mwa Zambia
Hilma Nakanduungile Katima Mulilo-Likomu zeketalizoho kazetalu zeneliuzwizwe libiki zetalu zefelile kwamunzi wa Kaliyangile mwasikiliti sa Zambezi lizofumaniwa biki yefelile mwa Zambia. Muna likomu Mulelela Chimpompa utalusa kuli, likomu nelitondahezi nako ya musihali imutongo wazona halikwalulela mwasakana kuli liyofula. Imutongo ili mwana wa naha Zambia natondile likomu zeketalizoho kazetalu nako yayolikwenula kuliba kwamulaka nako yamanzibwana. Nako yakutambeka likomu kumuna zona kwamuseto wa Wenela, mulauli wa sipokola mwasikiliti sa Zambezi Commissioner Karel Theron, naize, basipokola sa Namibia ni Zambia kibabakonile kufumana likomu zeo. Bulengwami bwalikomu mwasikiliti buipa mata, kakuya ka Theron, libaka lelitisa ahulu busholi kilakuli balimi baitusisa boimutongo bamazwahule kuzwelela mwa Zambia ni Angola. Mukwa wo utisa kuli balisana baikambotange nibahabo bona kutouzwa likomu ni lipuli mwa Namibia. Mwalinako zemwi lupalelwanga kufumananga likomu zeuzwizwe kalibaka lakuli lisiwanga mwahali alyangashitu mwa Zambia. Kanako ya cwale lutabile ahulu kalibaka lakuli bahabo luna ba Zambia basupelize swalisano mwahali kuluna,” kwa talusa Theron. Kanako yeswana Theron uelelize balimi kusebelisa bana banaha Namibia. “Nikupa balimi kukala kusebelisa bana ba Namibia kuli luambuke litaba zamufuta wa ze. Theron ukupile balimi kubeya mihato yeswanela kutibela busholi bwalikomu. “Lwabaeleza kazebaswanela kueza, kono haiba basaezi cwalo litaba zamufuta waze litabe lizwelapili. Balimi baswanela kubalanga likomu zabona kazazi ni kubiha litaba zabusholi kakuitahanela kwa mapokola,”kwa talusa Theron. Chimpompa yena naize taba ye haimutabisa kalibaka lakuli taba yabusholi bwalikomu sekutela habeli mwasakana ya hae, zeneuzwizwe sapili nelisikafumaneha nibukachenu le. Mwana munamuhulu Lameck Mubano yena nafitisize maikuto akulukuluha kwapili kalibaka lakuli likomu zabona nelifumanehile mi nakupile mapokola ba Namibia ni Zambia kuswalisana kusebelisana hamoho. Mubano ukupile balimi kubeya maswayo likomu zabona kuyezeza bunolo kwakuliziba kakutalusa kuli “balimi babasina lisipi zakuchisisa likomu baeze cwalo kakuitahanela. Kulubezi ahulu bunolo kukona kulemuha likomu zaluna sina bunata bwazona hanelichisizwe.”
Your experience on this site will be improved by allowing cookies.
