Easy access at the tip of your fingers, subscribe to our daily ePaper version of our New Era Newspaper.
Home / Limbo uzusiwa musebezi wa bueteleli bwa Bukalo
Limbo uzusiwa musebezi wa bueteleli bwa Bukalo
2017-09-11Staff Report 2 Aron Mushaukwa Bukalo-Katengo ka Munzi wa Bukalo kazwisize Limbo musebezi wa kuba mueteleli wa kona, kukala la 22 Muyana. Hana bulela ni ba makande Labune muinasituto wa katengo ka munzi, Charles Siyauya uize Limbo nafumanwi mulatu wa kusapeta hande musebezi wa hae kaniti ni luci, mi tumelelano ne fitilwe kuyona la 6 Sikulu kuli asiswe musebezi Siyauya uli, muzeko one uetelezwi ki Frans Kwala, nofumani Limbo “mulatu wa mafosisa amatuna hahulu hala’ teñi, kukenisa batu misebezi kanzila ye sikalumelelwa, kusinya-sinya masheleñi, mahanyi, kushwaula katengo ka munzi, kushimbulula masheleñi asikalumelelwa, kuhana kulatelela kelezo ya katengo kuli asike aeza mulalelo omutuna kasilimo sa 2016, ni kusayemela hande katengo.” Aekeza kuli Limbo nafilwe kolo yakuli alwanise katulo ye kakubilaela kwa katengo ka sikiliti sa Zambezi ili taba yasa ezize. Hana buzizwe kuli Limbo usiswa cwañi musebezi haiba nahuluzi famusebezi kusina fapelezo mwa kweli ya Mbuwana, Siyauya ‘alaba kuli Limbo na cincinze muhupulo ki kalibaka leo katengo neka kwaluzi muzeko, ko nafumanwi mulatu nikuzusiwa musebezi. “Kasamulaho aviki hasa tisize liñolo la hae la kutuhela musebezi lwa to amuhela liñolo le liñwi kuzwa ku Limbo lene libulela kuli hasalata kusiya musebezi mi nasatabela kubelekela katengo ka munzi wa Bukalo,” Siyauya atalusa. Kanako ye swana Siyauya nazibahalize Naomi Karupa, yana filwe musebezi ki Liluko la Litolopo ni Zwelopili ya Matakanyanyi, wa kuba mueteleli wa katengo ka munzi swalelele kufitela mueteleli ya swanela haka fumaneha. Hana kupilwe ku alabela fa litaba ze Limbo yana utwahala kunyema atiseza kuli naiketezi kucinca muhupulo wa kuhulula fa musebezi hato lemuha kuli katengo nekazwezi pili kumuzekisa, ni hana sa tuhezi kale musebezi kusina kapelezo. “Neni cincize muhupulo wa kuhulula fa musebezi la 22 Mbuwana, hanito lemuha kuli katengo nekazwezi pili ni muzeko mwahala’ 5 ni 9 Mbuwana, ili kuli nikone kufumana sibaka sa kulwanisana ni katulo haiba inge nifumanwa mulatu, kakuli haukoni kulwanisana ni katulo haiba haumubeleki. Haukoni kulwanisa katulo haiba uzwa mwa makululu,” kwa bulela Limbo. Limbo uekelize kuli muzeko no ezizwe asa zibi kakuli nase atuhezi musebezi nako ye uezahala. “Mufumana cwañi mutu mulatu wa kusa peta hande musebezi kaniti ni luci haiba satuhezi kale musebezi?” Aekeza kuli naboni kuli alwanise katulo kakuli kakuya kayena nzila yeo muzeko no ezizwe neli ya sobozi kakuli nasiyo mwa teñi. Utiselize kuli kucinca muhupulo kwa hae nekusa toloki kuli nabata kukuta famusebezi. “Mufumana cwañi mutu mulatu yana siyo mwa muzeko? Neni batolokezi mabaka ana tisize kuli ni cince muhupulo kasamulaho akuelezwa ki muyemeli waka… Neba ni fumani mulatu hala linyazo kaufela inge ni sikafiwa sibaka sa kuikalabela. Neni sika memiwa ni kwa muzeko.” 2017-09-11Staff Report 2
