Conrad Lutombi, yana zwile mubano kuba muzamaisi wakatengo kamuleneñi Windoko, ufumbela kusikuluhela kwamulao, haiba katengo kamuleneñi waWindoko kazwelapili kubabaza sinca situlo sa buzamaisi. Lutombi nabulezi zeo mwangambolo ni New Era viki yefelile, kasamaulaho katengo kakamaiso kafa piho yakuli kalulo ikale sinca kakuli nekubile ni mafosisa. “Mayemo aka kikuli hanilati kuakaleza kakuitinga falipiho zabamakande, kakuli nisa libelezi kuzibiswa kimuleneñi kaliñolo kapa neni ezize hande kapa awa. Haiba hani sika eza hande nika sikuluhela kwamulao kunyatisisa kalulo kaufela,” nabulezi.

Muleneñi uinzi usina muzamaisi kuzwa Njimwana 2020, kasamulaho Robert Kahimise atuhela musebezi kuyonga musebezi kwa Cenored. Situlo nesikile sababazwa mi baipapati baketalizo nebabizizwe, kuyofa milelo yabona patalaza, sapili kueziwa cwalo. Baketalizoho neli muzamaisi wakatengo kaNamWater Eino Mvula, Mubakweli kumuzamaisi mwaliluko la misebezi Joyce Mukubi, mubatisisi ni muipeleki Charmill Zamuee, muzamaisi wakatengo kaRoads Authority Lutombi ni Moses Matyayi, ili muzamaisi wakatengo katolopo ya Otjiwarongo. Lutombi yana ezize hande hahulu ubihiwa kuli halatiwi kikatengo kakamaiso bakeñisa kuli kimembala wakopano yaSwapo. Piho yalinepo ibonisa kuli Lutombi nafumani 80%, nalatelezwi ki Matyayi yana fumani 74% ni Mvula yana fumani 71%.

Kacwalo neku elelizwe kuli Lutombi afiwe situlo haiba inge ahana sifiwe kuMatyayi. Lutombi nabulelezi New Era kuli nalatezi kwasitulo sina mutu ufi Kamba ufi, mi fa ulibelezi kuzibiswa mone lizamaezi lika. “Kuna kalulo isa zwelapili. Hani lati kuakaleza. Hani sika zibiswa kale simubuso. Kono neni latelezi zene tokwahala kaufela. Kacwalo nilibelezi kufiwa linepo zaka simubuso, isi zebaliwa mwamitende,” nabulezi. Muzamaisi wakamaiso Larandja Ndeshihafela naize situlo sika babazwa hape mwalikweli zetalu zetaha, kakuli katengo hakasika nyatela kale kuli zetokwahala fasitulo kilifi. Naize katengo neka sebelisize mata akona kunyatisisa kalulo kaufela, mi nekafumani kuli nekubile ni mafosisa, kacwalo lika lina ni kukala sinca.

“Kalulo kaufela kabukuswani netezi silibonda ni mafosisa. Kusiezi feela kuli katengo kakamaiso kafe piho kwakatego kamuleneñi, kakuli hakuna kelezo yene filwe kwakatengo kuli kakete muzamaisi, nikuli kalulo ikale sinca kaputako,” nabulezi. Hana kupilwe kualabela fateñi muyemeli wakopano yaPDM Clementia Hanases naize hakuyo hande kuli situlo sibabazwe sinca, haiba kalulo kaufela nenyatezwi kikatengo kakamaiso. “Lika kaufela neli tisizwe kwakatengo kakamaiso, teñi nenili membala, mi nenyatezwi konji kanako libizo laya ketilwe halifiwa. Unyatela cwañi kalulo, kasamulaho linepo halizwa seli kuli kubile ni mafosisa? Taba yeo haiyo hande. Cwale fa bakasebelisa likamañi kuli bafumane yaswanela?” nabuzize?

Muyemeli wakatengo kaAffirmative Repositioning Job Amupanda naize kelezo yakatengo kakamaiso ifosahezi. “Kimafosisa. Nekusikaba ni kusikeka, kakuli kalulo kaufela nekenile,” nabulezi pili muhala usika pumeha kale. Muyemeli wakopano yaSwapo Fransina Kahungu naize nasiyo piho haifiwa kwatengo. Kono naize keto yakatengo kakamaiso ibukelezwa kimulao ozamaisa zakukenya misebezi. Kono muyemeli yomuñwi waSwapo Queen Kamati naize “katengo hakasika kandeka kale piho yakatengo kakamaiso. Kasamulaho luambola zene tisize kuli katengo kakamaiso kafe kelezo kuli lika likale sinca, luka fitisa foluyema.”