WINDOKO – Ofesi ya Mueteleli wa naha ilumela kuli ika buluka masheleñi alikana bolule bamyanda yemibeli (N$200 million), kulatelela buiketelo bwa kamaiso ya naha bwa kuyemisa kulekela makwambuyu ni babeleki babañwi bamuuso limotikala ze nca, mwalilimo liketalizoho zetaha. 

Mwa manzwi ane ahatisizwe viki yefelile, sibuabui wa ofesi ya mueteleli wa naha Alfredo Hengari naize Geingob ulaezi hape kuli kufukuzwe sebeliso ya mafula ki babeleki ba muuso. Natolokile kuli taelo ya Geingob kiyeñwi ya mihato mwa kutiseza kamaiso sakata, kubupa sinca muuso ni kufukuza lisinyehelo kanako ya kakokwani ka Korona.

“Kasamulaho akuba Mueteleli wa naha kasilimo sa 2015, Mueteleli Geingob nakalile pupo yenca yetuna ya muuso ili kuli kutatululwe mayemo asifumu sa lifasi anze akutela fafasi,” nekubulezi Hengari. Naize linanga lelinze lizwelapili kutaha mwalilimo zeketalizoho zefelile lifofalize mayemo amuuso. Ofesi ya Mueteleli wa naha neize kuzwelapili kufa litaelo kwa liofesi za muuso, maluko ni tutengo kuli tusebeze hahulu kaze likani, puluko yetuna mwa muuso ibonahalile mwalilimo liketalizoho zefelile, kungelela cwalo nikufukuza kwa masheleñi akuya mwa misipili, ane aize napumilwe ka 62%.