• November 18th, 2018
Login / Register

Mandu anayahilwe mwa Katima akafiwa batu


Aron Mushaukwa Katima Mulilo-Mandu anayahahilwe mwamungendenge wakuyaha mandu kabuñata mwa Katima Mulilo mi naitulezi feela kalilimo zefitelela zepeli akafiwa kwabañi baona pili kweli ya Liatamani isikafela kale. Muzamaisi wa NHE Gisbertus Mukulu napatuluzi taba yeo mwa mukopano ni Katengo Katolopo ya Katima Mulilo viki yefelile. Mukulu naize mandu amyanda yemibeli ka amabeli (202) anayahilwe mwa Katima Mulilo ana nibañi baona, kono kutambekiwa kwamandu awo, nekulyehisizwe kimatata amañwi. Naize mandu amainyani afitafa 89 safilwe kwabatu, mi kusiyezi feela asupile awo nihana nibeñi baona habasika afiwa kale kakuli asana nimatata alimbuzi, mi matata awo akatalimiwa kabubebe. Kono buñata bwa mandu aswanela kulekiwa falikoloti hasikafiwa kale batu. Ubulela kuli tiyeho yeo netile kakuli nekuna nikueza bunya kwalipanka zefa likoti kwabatu. Naize kimandu feela amashumi amabeli ka aketalizoho hala mandu amwanda ka asilezi awo lipanka nelikonile kufabatu likoloti, mi alishumi ka amalalu safilwe bañi baona. Mukulu naekelize kuli taba yeo setatuluzwi kakuli muuso nonyatezi kuli katengo ka NHE kalekise mandu awo, mi kacwale lika selizamaya kabubebe. “Kuzwa kweli ya Njimwana ñohola kutisa cwale mandu amashumi amane ka asilezi salukuluzwi kufiwa batu mi kweli ye isikafela kale akafiwa kwabañi baona. Amasumi amalalu ka aketalizoho ona lulibelezi feela mampampili kuzwelela kwabaleki, kacwalo niona atuha afiwa kwabañi baona,” nabulezi. Nihakulicwalo Katengo Katolopo ya Katima Mulilo nekasikatabiswa kimukwa wo katengoka NHE nekasebelisize hane kafa mandu kwa batu. Kanyaza ba NHE kuli nebasikalatelela likelezo zenebafilwe kikatengo katolopo. Bali buñata bwabatu bao ba NHE nebafile mandu bana nimandu nikale kapa sibaka sakuyahela. “Luna nibatu babañata babakona kufiwa, babasina sibaka sakuyahela, babañwi sebainzi mwamandu akulifa kwabatu kuzwa silimo sa 2008, babañwi kuzwa silimo sa 2005. Habana sibaka sakuyahela, habana mandu, kono ofesi ya NHE yamwa Rundu nefile mandu kwabatu babana nilibaka zamayahelo, nibao babana nimandu. Kikafo halusikataba. “Fa seluinzi nikalulo yakuli taba yamutu alimuñwi mayahelo alimañwi haina kusebeza mwa Katima. Nelubile nibuiketelo kono mina kikale mulusiya nimasuba nilipuzo zeñatañata. Mitangana bamwa Rundu nebaziba sene baeza,” nekubulezi muzamaisi wa tolopo ya Katima Mulilo Raphael Liswaniso. “Kubonahala kuli mwendi nebaziba kuli hane bafa mandu kwabatu bakatisa matata. Kakuli nelubafile pampili yesupeza fokusweu kuli ngete una nindu, ngete una nisibaka sakuyahela nicwalocwalo. Kono bona nebazwezipili kufa batu mandu, kona haluna nibutata,” nabulezi. Babeleki bane bazwa kwa Rundu nebaikalabezi, nebaize nebalatelela likezo zene zwa kwa katengo katolopo. “Haiba mutu una nindu kapa sibaka sakuyahela nasafiwi ndu, konji haiba famukoloko one bafilwe nekusabonisi cwalo.
New Era Reporter
2018-01-29 10:02:09 9 months ago

Be the first to post a comment...