Shoki Kandjimi

SHIGHURU – Mberewa zovaChina moNamibia sivike kasipwire kava geve nondja ntani yiruganeso momambo kovanekoro wokusika ko 230 pomukunda gwaShighuru. Eyi kayihorokere kutunda tupu poopo munamberewa gwaChina kakadingwire mukunda gwina nokukadimburura asi vantu vatunga pomukunda kapi vana kuparuka nawa. Mugenda gwina kavamutenterere asi vatungimo kuna kara noudigu wonondja dina sesupa. Mokugwana nye oyo, mberewa zomukarelipo sirongo saChina yipo kahundilire vanangesefa wosirongo sawo makura awo yipo kavalizuvhire vagave nondja nayimwe ngoso konkarapamwe.  Mukunda ogu kwakara momukunda horowero gosintokorwa saMashare. Apa kakahuyungire posiruwo oso, mukarelipo gosirongo saChina, Charlene Chan katente asi mberewa zawo kwagawana mbapira zina kutunda kompitisili gomomukunda atjangere mukarelipo gwawo asi awo vana pumbwa nondja ano mukarelipo Zhang Yiming yipo nye kalimbwilire. Ose kuna kulizuvha mfumwa nouwaawa mokukara apa tugave nondja edi kovatungimo womukunda ogu gwaShighuru. Ose nsene tatumona vantu vana kunana noudigu neparu, ose nkenye apa kuhara kuvatera vantu vana kara nompumbwe, yimo ana kutanta Chan. Chana simpe katente asi vaChina kuvhura vavatere vantu vana kara moruhepo nsene vana kara nayo, morwa awo ngesi kuna lituramo mokuvatera vantu morwa udigu ou tuna kara nawo woCovid 19.  Apa kakatambwire uhwi ou, nguuru gomukunda Kavango zoupumezuva Bonifatius Wakudumo kapandwire nomfumwa vaChina vatunga moNamibia nokudiworokesa vantu asi Namibia naChina kwakara neruganeno kumwe lyewa pokatji kovantu vawo. Ose kuna kupandura eyi muna tupe, twikireni ngorooro sirugana sosiwa,’’ yimo ana kutanta ngoso Wakudumo.