2016-11-24Staff Report 2 Mokukwama tupu vamwe vakoreki womakonakono, kukwama mfuto zawo, Ministeli zerongo, yifanayika nompo kavageve mbudi asi awo vana pulisire mfuto zovarongi vana kara asi kuna kukoreka yirongwa eyi vatjanga varongwa wontambo ndunge zomurongo ntani zomurongo nambali, kukwama omu kavayigwene kutunda ko mberewa zakererapo varugani veme pangero. Vamwe wovarongwa kava kere tavasivana asi awo kapi vagwana yimaliva yawo kutunda tupu apa vatameka kukoreka. Makonakono gontambo zomurongo kwatameka mwa September 26, dogoro November 2, ano siruwo nye oso wontambo zomurongo nambali kwatameka mo September 26 dogoro moNovember 11. Hamutjanga gokukarereramo moministeli zerongo Sanet Steenkamp, nkera katente asi yimaliva yavawokuhingira vatare malimbururo simpe kuna kuyitarurura kumwe nokuzerurako nsonso zize po 5% eyi yakere asi nayo kumwe nenyatero eli vatulire sinkwa ntani apa vatulire elizuvho pokatji NANTU nePangero mokwedi kwaOctober. Varongwa vahamena kombunga zaNANTU kwazire melyatero ndi asi enyoko kuza koyirugana, omu vahere asi vahepa kuvafuta noperesenta 8% megwederero ano epangero alyo asi dahepa kukara noperesenta 5%. Age katente asi ministry kwatulisapo ngendeseso zongwa pangenderera moomo tupu yina kuwiza yimo hena nokuyirugana. Nomberewa domukunda kuna kudihundira asi vahepa kugenderera nsene vana gwana mahundiro aga vagatume usimbu komberewa zomakonakono. “Ose kuna kupandura varongi ava valituliremo unene mokuyarugana yirugana eyi kumwe nokumana nosiruwo.” Ministeli zerongo kwatente asi kuna hepa varongi wokusika ko 1717, vayakoreke yipepa yovarongwa wontambo ndunge zomurongo, ano ava wontambo zomurongo nambali vahepa kusika ko 812, ntani 253 owo wokukoreka yirongwa yepeguru. Mvhura ezi, konyara 21 104 ntambo ndunge vanona kwakere vanakutjanga makonakono, yivhulise mvhura zina kwakere 20 301. Ano ntambo ndunge zomurongo nambali awo kwakara mvhuar ezi 14 336, mvhura zina kwakere 13 172 kehagero lyomvhura. Ano nye ava vakara asi kapisi kwahingira mononkondwa rongero, wontambo zomurongo nambali kuna kara 30 016, vanahingire ngesi vakatjange ano mvhura zina puko kwakere tupu 27 531. Kuna kara tupu asi wokusika ko 407, vanona yiwo vasika pontambo zokuzeruka mvhura ezi. Nye, 38 457 wontambo zomurongo vakere mononkondwa rongero mvhura ezi, kupakerera womvhura zina kwakere 37 457. Ose ngesi kuna kuuyunga asi vanona wokusika ko 11 735, wontambo zomurongo yiwo vanatjanga ano mvhura zina kwakere tupu 11532. 2016-11-24Staff Report 2
