Mipendo yelikana 75 000 ya AstraZeneca yakulwanisa butuku bwa Covid-19, yene neuzwi kinaha Germany neitekezwi kufita busihu bwa mabani, muzamaisi yomuhulu mwaliluko la makete Ben Nangombe nabulezi Labune. Mipendo neitekezwi kulula kwalibala la lifulai la Hosea Kutako. 

Kukala la 4 Muyana batu babafitelela
169 790 nesebafumani omuñwi wamipendo yakulwanisa butuku bwa Covid-19, mi babafitelela 51 138 seba amuhezi mupendo wabubeli mi bangiwa kuli bapendilwe kutalelela. Sicaba sibilaezi kuamana ni mipendo yesafumanwi kabunako. 

Muzamaisi mwaofesi yanaha US yelwanisa matuku mwanaha Namibia, Dr Steven Hong, naize sihulu mupendo waAstraZeneka lipatisiso libonisize kuli hakufita nako yetelele mwahala mipendo yemibeli kona usebeza hande. 

“Batu baswanela kuamuhela mupendo wabubeli mabapa ninako yelumelezwi. Nihamulyeha kuamuhela mupendo wabubeli mwanako yemufilwe, hakutoloki kuli muna nikukala sinca,” nabulezi. 

“Nihamulyehile muswanela kuamuhela mupendo wabubeli kakuli mungiwa feela kuli mupendilwe kutalelela liviki zepeli kasamulaho akuamuhela mupendo wabubeli. Kacwalo batu basa swanela kunga mihato yasilelezo.” Naelelize bayahi banaha Namibia kuzwelapili kutina mamasiki kaswanelo, kuba mambala, kuambuka mikopano ni kutapa kwamazoho nako kaufela. 

“Halulatelela milao yeo kuekeza nikupendiwa, lukona kuyemisa kuambalakana kwakakokwani,” nekutalelelize Hong. Naha Namibia ibata kupenda bayahi babalikana lule ni licika kapa 60% yabatu babapila mwanaha Namibia pili la 22 Liatamani 2022 lisika fita kale. Kono kuzinyazinya kwabatu kukona kutisa tiyeho. 

Likwambuyu wamakete Kalumbi Shangula naize naha cwanuñu ika amuhela mipendo yeñwi kungelela cwalo ni mupendo waJohnson & Johnson oneuzwi kinaha US. 

Nabulezi hape kuli mupendo oneuzwi waAstraZeneca ukatusa sicaba babalibelezi kuamuhela mupendo wabubeli. Butuku bwa Covid-19 sebubulaile batu babafitelela likiti zetalu mwanaha kuzwelela habuzuha mwakweli ya Liatamani ñohola.