Home / Mudivi goyimaliva ngesi takakara nye hompa gwaukwangali Mudivi goyimaliva ngesi takakara nye hompa gwaukwangali
RUNDU - Eugene Siwombe Kudumo ngesi tava kamutungika asi yige hompa gorudi rovakwangali, momazuva 25 April 2015. Age kuna kupinganena mevango lyanakufa hompa Daniel Sitentu Mpasi. Vegendeso lyaukwangali kavayinkondopekere eyi yokutanta asi Kudumo yige vana kukapinganesera mevango eli lyouhompa. Hompa Sitentu kwadogorokere kouvera momazuva 17 December 2014, mosipangero saNkurenkuru, moKavango zoutokero. Age kwayadogorokere nonomvhura 80, komeho aka dogoroke age kwatumbwire nkwami zendi Eugene Siwombe Kudumo ogu galikidire kovantu yikando yokulisiga siga, nomukaro asi yige ngakagusa uhompa nsene asi Sitentu ana dogoroka. Posiruwo sooso age kwahundilire vegendeso lyorudi varuganene kumwe naSiwombe, morwa ngaka pumbwa ekwatesoko lyawo. Mokukwama ava vayidiva, yimo ngorooro ayihoroka asi hompa kutumbura gumwe gesimo lyawo nokumupa sinka asi nsene nakapirapo ove nyove nye nokagusa epundi eli. Nopwa nare yimo yahorokere asi hompa Joseph Kandjimi Murangi kwatumbwire Sitentu asi nsene nafu nyove nokagusa uhompa yimo ngorooro yahorokere apa gayadogorokere mo 1978. Apa nye kauyungire kosayitunga zaNew Era, Kudumo katente asi age ana liwapayikire mokukarugana asi hompa gwaUkwangali. Nokutanta asi sirugana esi sidigu, nye ame nina manamo moomu navhulira nikaruganene rudi rwange. Ame nimuhompa, kwakulira mezimo lyouhompa ntani kweyi yompo hawe name kwayidiva unene. Vakuru vange ntani masimbi gaga vaterange mokusikisamo sirugana sange. Kudumo kavamuhorowere vazimo lyouhompa ntani verero nawo yiyo kavayavatanterere, kuna kumoneka asi ngesi takagwana nye evango lyendi lyouhompa ntudi yopeke nayihoroka yige kukara hompa vene.Apa nye gadogorokere Sitentu, age kwapangerere sirongo sendi novantu vendi nomvhura 35, pwahana kukara asi esonagwiso lyongandi. Kudumo apa tuna kuuyunga ngesi age gumwe varonga yirugana noyimaliva, murugani konomberewa derongo koruha royimaliva komberewa zawo zonene moRundu.
Your experience on this site will be improved by allowing cookies.
