Home / Mugazarerwa ukorokotji kafire konyima tupu mokuliroyanga kumwe novaposi Mugazarerwa ukorokotji kafire konyima tupu mokuliroyanga kumwe novaposi
Linea Dishena Windhoek-Gumwe gwava vana kugazarera asi kuna hamena moutjotji wokuvaka mositora saShoprite Usave moKatutura morukanda rwaSoweto nkera kava mudivisire asi ana fu ndi ana dogoroka. NBC, kava gusire nonankango domuuuyungilipo vaporosi omu ana kutanta asi mugazarerwa ogu nage gumwe kakere mowidi woumahaka omu kavalitambagwire mauta kumwe novaporosi omu kava kamukonderere mosipangero omu kakadogorokere. Vagara ava vatano kavavahamatere nkera ngurangura konyima tupu omu vaporosi vaNamibia kavahomokerere vawidi ava. Omu kageve pausupi mbudi ezi kovanambudi pevango poopo kayihorokerere, mukurona govaporosi ndi asi NAMPOL, Regional Commander Silvanus Nghishidimbwa, katente vantu vatungamo morukanda rwina yiwo kavageve mbudi ezi omu kavamwene asi kapi yahorokapo yihorokwa yangesi yina kuhoroka pevango lina. Awo kavatente asi vagara vatano vanadwara mudwaro vana kutumbura asi balacalavas kuna moneka positora poyiha yonovili 07h00. Apa nye vana hwilire mositora gumwe govalingilingi kalikire uta komukurona gomositora, omu ana kupura yimaliva yimo ngoso ana kutanta Nghishidimbwa. Melikwamo olyo lyangoso varugani vamo kava kere vana tukuka kumwe nokudukamo mositora yimo ana kutanta. Nghishidimbwa katente asi vaporosi kapi kavalirenge kukasika posiruwo oso makura vagazarerwa yipo kavatamekere kuroya kovaporosi eyi kayitwarederere vaporosi nawo vatameke kulimburura mokuroya. Vagazarerwa vavali kavavaroyere kumwe nokuremana kumwe mokuguru, ano ogu gumwe moyilyo yendi yomonda-makura yipo nye kavavatwere kosipangero sepangero saKatutura mekeverero lyovaporosi. Vatatu nawo kavavakwete nye ava vavali kavadukire. Kwato muporosi ndi muntu gokulikarera karemanene mosiruwo sehudi eli, kumwe nokutanta asi kwato eyi kavaveke. Vaporosi kavakwete mauta aga kavaruganesere vatjitji ntani ehauto lyawo-eli lina kara asi kapi valitjangesa lyongorodo lyedina Polo Vivo. Nghishidimbwa katanterere vanangesefa asi kapisi vature yimaliva yoyinzi momavango gawo goyitora, morwa sinzi sowo vana mahaka kuna kupapara yimaliva. Komisare katente asi poyihorokwa yimwe valingilingi kugwana nombudi kovarugani ava rugana mevango lyoolyo nokuvatantera asi awo kupungura yimaliva pevango lyoolyo.
Your experience on this site will be improved by allowing cookies.
