Windhoek – Presidente Hage Geingob kakere gumwe ana kupitisira kugava mbudi zoruguwo kovakansela ava vavali Lotto Kuushumwa naSamson Nghilumbwa ava kavadogorokere monomfa dokulisiga nkera ngurangura. Siruwo sooso tupu zina kuwiza mbudi zondona omo kansela godoropa zaWalvisBay Nghilumbwa kadogorokere konomfa dehudi lyosihauto pepi naSwakopmund ngurangura, siruwo sooso mbudi hena zaKansela gomukunda horowero Oshakati zoupumezuva Kuushomwa nazo kuna kububuka hena. Kuushomwa kaligende mondango zanavenye siruwo oso awo kuna hingire monzugo zomaliyongo.
Vaholi zendi Lotto Kuushomwa kuna kumutjangurura asi muntu gononkango dononsesu nye ado kugava mukumo ndi asi kutumbura yininke yomulyo.
Kuushomwa ogu vana kutanta vakwawo asi age kakere tavere kukara mosipangero gatundamo gatengwiramo kutunda tupu mvhura ezi zina puko, age kaligende monzugo ezi avaliyongero wondango zanavenye. Posiruwo nye oso tuna kuzuvha nomfa odo, Presidente Hage Geingob katente asi; asi kuna kuzuvha unene kukora mokuzumbanesa vantu ava vavali vakara asi nompitisili dovantu mezuva limwe tupu. Ngosirongo, ose ngesi kuna kulira gumwe gwetu mukondjeli emanguruko ntani president gona gosirongo gakere, Cde Nickey Iyambo, yimo hena tuna kudiworoka murwi gwanare kansela Kuushomwa ntani kansela Nghilumbwa omu tuna hara asi ngano tuna dike embo lyetu lyewa lyaNamibia. Ava kavakere vana tukuka vakansela vakwawo kavakambadarere asi ngano vadukise Kuushomwa kosipangero saKatilika moVenduka nye age kadogorokere nye tupu vana kukasika.Kuushomwa kwamuhampuruka mwa Nsinano, 3, 1960.
Ngosilyo sondango zanavenye age kwakara silyo sokomitiye soHabitat. Age murwi gwanare gombunga zaSWAPO, ngavatumbura asi PLAN, ntani age kwakere gumwe nagsingi etjeketjeke ndi asi dira.Kuushoomwa kwakara kansela gwaOshakati zoupumezuva kutunda mo 2004 age gakere asi musipundi gokansela zaOshana kutunda mo 2010 dogoro mo 2015, mokukwama vanambudi vaNampa. Age kwatameka kukara silyo sondango zanavenye kutunda mo 2015. Munasipundi gondango zanavenye Margaret Mensah-Williams nage gumwe kageve mbudi zoruguwo.
Mokukwama mwendi, Kuushomwa kuna sigi yirugana yomutaro unene oku nye tuna kurugana nendi mondango zanavenye. Siruwo oso tuna kulira mukwetu mukutunda gwange ntani mokukwateramo vakwetu mokugava mbudi zetu zoruguwo kovanekoro, vakamarada novaholi. Mwneyo gwendi gukapwizumuke nombili. VaSWAPO vakwawo mondango zanavenye kansela Hilma Nicanor kuna kumudiworoka asi mukwawo zendi ogu vakere nendi moukwayita waSWAPO awo ponze zosirongo.
Nicanor katente asi age namudiworoka asi mulitulimo gomunene ogu galituliremo asi sirongo sendi saNamibia sahepa kugwana emanguruko. Ezi kuna kara mbudi zondona unene,unene kovatulisipo noveta. “ Ame kuna kulizuvha asi nazumbanesa kapisi asi muNamibia tupu, nye mukondjeli manguruko, yimo ngoso ana kuhuyunga.” Silyo saNUDO mondango zanavenye Peter Kazongominja, ogu ana kara asi kansela gwaAminius, nage kazimugumine mbudi ezi mokuzuvha asi Kuushomwa ana dogoroka kovanambudi. ‘’ Ame guna pwagange. Kapi kanikere membo kanikere kepongo limwe lyopeke. Ame kapi nina kuyitambura yonomfa dedi. Age Muholi zange. Ose kuhingira kumwe ntani kuturapo nkenye apa yizoresa , yimo ngoso ana kutanta”. Age simpe kagwedereko asi ngadiworoka Kuushomwa asi mugara gapira rutandu ndi atare asi ove komukunda musinke watunda. Age kwakere mudameki mosirugana dogoro mvhura zina puko apa galigende modoropa zaOtjiwarongo. Age hena kapi nye gakere asi akare momapongo nagenye. Kapi gakere asi simpe Lotto Ogu nadiva. Age ngayimudigopere mokugenda yimo ngoso ana kutanta. Melania Ndjago, nage gombunga zaSWAPO, kansela gwaKaribib, katente asi Kuushomwa kwakere muntu govantu age kufumadeka nkenye muntu. ‘’ Apa nye ahuyunga hawe kutanta Yuma. Age nkenye apan kukumburura komaliyongo gomulyo. Ame kuna kuharera vanekero mukumo mosiruwo esi tuna kumulira. Karunga yige agava ntani yige agusa. Gumwe kahuyungire kuna kara Jason Ndakunda, nage silyon saSWAPO ‘’ katente asi ame kuhingira pepi nage. Age nkenye apa kutjanga eyi vana kuhuyunga, age kapisi muntu gokuhuyunga huyunga, nye nsene gogo ana kuhuyunga hawe yahepa kutanta Yuma. Age nakufa mukwayita mwenemwene yimo asi vakwayita kapi ava huyunga unene.