Home / Munyama Kakamonekere Kompanguro Munyama Kakamonekere Kompanguro
Mugendesi ntoni gwanare goNBC,Gerry Munyama kakamonekere kompanguro sikando saune moVenduka.Mukurona ogu gwanare goNBC kwamonekere rwautatu kompanguro mwaSiwogedi 16,2006 apa vamutanterere asi mpanguro zendi vana zirundurura dogoro mo22 Mangundu 2006 yipo vaporosi vamane kukonakona udigu owu. Ano mezuva olyo nye kayihorokere nkenye gumwe kandindilire asi umbondo owu kuvhura usike kehagero vadive asi yinke yahoroka.Mazuva nagenye aga gamonayika kompanguro Munyama kapi ava mupulisire asi apatane komaumbondo ogo gamutamba gowidi woyimaliwa eyi vamugazarera asi age kwatura N$346 000 melimba lyendi apa gakere asi mukurona goNBC.Age kwalifutira modogoro noN$10 000 akare ponze nonokonda dongandi.Muhahende gomoVenduka A Muller yige kakererepo mugazarerwa ogu ano siruwo ose ahende Petrus Grushaber kakererepo epangero. Maumbondo age gana tamba Munyama kwagaturamo vagendesi woNBC,konyima tupu apa vamuhagekesere yirugana mwaMangundu 2005.Munasipundi goNBC,Ponhele ya France kwayigeve kovanambudi asi Munyama kwalihameseramo mwene moumbondo,asi age kwatura yimaliwa oyo mombanga zamwene ntani age hena kwazegururako kombo aka anyatere gelike ano yimaliwa oyo yoNBC.Ano Munyama yiyo gatokwere asi tahageke yirugana nampo udigu wendi navaukandurapo.Age kwahagekere yirugana oyo komeho ngano aka moneke kombunga ezi zakarerapo mapisuro govarugani woNBC. Munyama kwamutulire moyirugana eyi mwaMurongagona 2003,konyima apa ngarugana komberewa zomukarelipo Namibia moWashington DC,USA.Age kwagusire evango eli kwamukwawo zendi dokotora Ben Mulongeni.Evango olyo lyomuporongwa kavalitjingisire mvhura zeezi.Hamutjanga gokukarereramo gwanare mouministeli wonombudi Vezera Bob Kandetu yige nye mukurona gevango eli gomupe.
Your experience on this site will be improved by allowing cookies.
