• August 5th, 2020

Mupokola uketiwa induna silalo



Mubihi wa Mutende

Katengo ka babanca ka Mafwe, ili mutayi wa Khuta ya Chinchimane ya Mulena George Simasiku Mamili, neka fitisize manzwi akona ku Masule Mutau, kasamulaho akuketiwa silalo induna wa Maunga-Malihela. Mutau ili muzamaisi yomuhulu mwa sipokola ubile yomunca wapili, kuketwa kuba induna ki khuta ya Mafwe ya mulena Mamili mwa sikiliti sa Zambezi. Manzwi nafilwe ki Sibuku Malumbano, ili muñoli yomuhulu wa katengo ka babanca ka Mafwe.

Mwa manzwi akona katengo mokuna ni muinasipula, mubakweli kumuinasipula, muñoli yomuhulu, mubuluki wa masheleñi ni muongaongi nekaize: “kakukala luipuze puzo yakuli nibulela puo ifi? Nitabela mazazi acwañi? Niwa mushobo mañi? Nizibahala ka sizo mañi? Sizo saluna kona sesilu bupa. Sibupa mikwa ni butu bwa luna. Sizo ki mukwa wa kupila, sisupa kwa litumelo zelukopanya, mikwa ya kamita hamohocwalo ni milao ye fiwa kuzwa kwa lusika kuya kwa lusika,” nekubulezi Malumbano.

“Ki kamanzwi awo kamaiso kaufela ya katengo ka babanca ka Mafwe, itaha hamoho kutabela kuketwa kwa Mutau kuba induna. Kuekeza fo, ukoliswe kuli halutabi feela kabaka la bunduna bwa hao, kono lukulemuha kuba mueteleli wa sizo.  Lukuteka mayemo ahao akuba induna silalo yo munca. Lulemuha musebezi tuna okapeta mwalilao zoketezwi kuzamaisa za Mafwe. Kono kanako kaufela lukanga musebezi wa hao kuba wa butokwa. Luyema kakutiya kuitumela kwa Khuta ya Mafwe, kakulemuha kuli babanca kona baeteleli ba kamuso mi kuketwa kwahao ki kwabutokwa,” nabulezi. “Sepo yaluna mwamusebezi wa hao ki susueza kakusa likanyeza mikwa ya luna ya sizo, kamaiso ni kuongaonga sicaba sa hao, kakamaiso sakata sina baeteleli haba ketiwa kiyali kwa halimu.”


Staff Reporter
2020-07-13 09:21:04 | 23 days ago

Be the first to post a comment...

You might also like...