New Era Newspaper

New Era Epaper
Icon Collap
...
Home / Mutungimo modoropa zaRundu kavamuroyere morwa funguna

Mutungimo modoropa zaRundu kavamuroyere morwa funguna

2019-07-25  John Muyamba

Mutungimo modoropa zaRundu kavamuroyere morwa funguna

Rundu - Muntu gonomvhura 27 mugara kavamuroyere vawidi vamwe posiruwo oso age kuna kutunda koyirugana moutano kongurova ano konyima yiyo kakadogorokere mosipangero sepangero moRundu oku kavamudukisilire akagwane uhaku. Ehudi eli kalihorokere koyiha yonovili 1950 korukanda rwaNdama momundema pepi tupu nositasi somaholi sokondama. Nonzira domoRundu unene edi dakara asi momundema mwaza mazuva kuna dikuyauka vatungimo ava vana kunyanda koyitodi nsene asi kuna kara mundema unene, nye runyegenyo rwawo kuna kara asi kapi runa kugwana mbatero nkenye, yina kara asi noramba edi dadima mononzira dokugenda vantu kuna kara ngorooro vanaha kudiwapayika. 

Vaporosi nawo kavageve masivano asi nonzira edi dina pilire noramba kuna kureta udigu moyirugana yawo. Mosihorokwa nye oso sosipe, muhomoki karuganesere uta kumwe nokuroya nakufa ogo korulyo rwedi konyima. Edipago eli kaliwizirepo siruwo sooso mugazarerwa kagwewire funguna zamuholi zogo kavadipagere age mwenya funguna mukadona. Nakufa kahere ngano asi opopere ogo vana kugusa funguna zendi makura yiyo nye kavalikondjesere kumwe nomugazarerwa ogu karoyere nakufa, yimo nye ngoso ana kutanta komisare gona govaporosi vaNamibia moruha Kavango upumezuva Bonifatius Kanyetu, ogu kankondopekere asi sihorokwa sangoso sina horoka. Nakufa kuna mudimburura asi yige Elago Joseph, ogu vakuta wositora soMr. Price zomoRundu. ‘’Óse kuna kuhundira vatungimo moRundu, unene vatunga korukanda rwaNdama, unene mokutuvatera vatupe nombudi douhunga ndi mbatero nkenye eyi nayitwaredera tukavhure kuhamata muntu ogu karugene ndi asi mugazarerwa ogu,’’ yimo ngoso ana kutanta Kanyetu. Funguna ezi kavaveke kuna kara zedina Samsung Galaxy j1.


2019-07-25  John Muyamba

Share on social media