OSHAKATI – Muuna walilimo zemashumi asilezi kazelobañwi (69), yanyazwa hala kutondahala kwabolulelule bwa masheleñi kwakatengo kakabona zapuluko yamasheleñi ababapumula famusebezi (GIPF), nabonahalile mwa Khuta ya Sikiliti ya Oshakati viki yefelile. Dominikus Shivute kiyena feela alimuñwi yabeilwe mulatu kano yacwale hala sitangu sesi lyangani, ili teñi mali alikana bolule ba myanda isilezi (N$600 million) na uzwizwe kwakatengo ka GIPF, kalikoloti zenefilwe kwalipisinisi zefumaneha mwanaha Namibia. Kulumelwa kuli likoloti nelifilwe kwalipisinisi zene saswalehi hande, Kampani yene file likoloti zeo ili yene zibahala ka Development Capital Portfolio (DCP) nesebelize kuzwa silimo sa 1996 kuisa 2006. Katengo ka GIPF kona kabulela kuli neka konile kufumana kekezo yelikana bolule ba 146 (N$146 million) nihane kabeezi kwatuko likoloti zelikana bolule ba myanda isilezi.

Kasamulaho yomuhulu wabazekisi Martha Imalwa, nabulezi patalaza kuli masheleñi hasakonwa kufumanwa nikuli alatehile kuya kuile, buñata banyazize taba yeo hala taba yakuli lisinyi lisiilwe feela, mi buñata babulela kuli Shivute ufetuzwi “muuna wamawelo”. Imalwa naize lipatisiso hala mali a GIPF nelindongwami lipisinisi zemashumi amabeli. Kono nahanile kuzekisa balishumi kabalobapeli bakeñisa mabaka abalwa, hala teñi kutokwa hande bupaki bwakuzekisa bayemeli balipisinisi zeo. Taba yeñwi isa sweli kutalimwa mi buiketelo buka ezwa kapa kuka kwalulwa muzeko. Mwaponahalo yahae viki yefelile Shivute ili muuna walipisinisi mwamutulo wanaha, naize uka ikemela nihana elelizwe kuli abate muyemeli, bakeñisa butuna bwa mulatu wanyazwa kaona. Shivute una ni pisinisi yezibahala ka BSAE mwa Ongwediva, mi nafilwe mali alikana bolule basilezi (N$6 million) kikampani ya DCP. Mi bupaki bwa khuta bubulela kuli kalulo yamasheleñi awo nasebelisizwe kuleka limota. 

Kanako kampani yahae haikwalwa Shivute ukulubelwa kuli napalezwi kupatulula limotikala zetalu. Ku akalezwa hape kuli Shivute nalobile mulao, kamulelo wakubata kuputelela, kupuma mubakweli kuyomuhulu wasipokola hala kuli limotikala neli zamañi. Limotikala zebulelwa kuna motikala ya Isuzu KBE 250 LE yanombolo N 129 SH yana lekile mwakweli ya Muyana 2002 kamali alikana N$123 334.20. Yeñwi kimotikala yamufuta wa Opel Corsa Bakkie 170D yanombolo N 1517 SH yana lekile silimo sesiswana nikweli yeswana kateko yelikana N$73 657.10. Yeñwi motikala nailekile silimo sesitatama ili Mercedes-Benz 6 Ton truck yana lekile famusika kamali alikana N$64 000. Kwanda akupata kuli limotikala liluilwe kimañi, Shivute ukulubelwa kuli natutisize limotikala kwasibaka salipisinisi sa BSAE kuli isa kwa BSAG kuli bayo lisebelisa, nihana salumelelwi kueza cwalo. Bazekisi bamuuso bana nimaikuto akuli yanyazwa nafile bupaki bwa buhata hala limotikala nihana ziba kuli nelilekilwe nimali ana fumani kwa GIPF. Muzekisi wamuuso ki Nelao France, mi muatuli yomunyinyani ki Leopoldt Hangalo.