WINDOKO – Muuso uneuzi masheleñi alikana bolule babalalu ni licika (N$3.6 million) mwakutusa batu babalikana 777, ili babalehi babakutile cwanuñu kuzwa kwa Dukwi mwanaha Botswana. Sikwata nebakile bahana kuiñolisa kuli bakute kusina kapelezo, bandu yamilao nebabulelezwi viki yefelile. Kukutiswa kwabona kulatelela katulo yene filwe mwakweli ya Sikulu unumwaha, kikhuta yanaha Botswana, ili yene patalalize kuli babalehi banaha Namibia bane bali mwa Dukwi mwanaha Botswana nebainzi isi kamulao. Babalehi babase bakutile neli kalulo yasikwata sesilikana 2 400, sabayahi banaha Namibia bane babalehile mwanaha mwalilimo zama 90, mi bayo tibelela mwa Dukwi kasamulaho alikezo zakubata kupuma sikiliti sa Zambezi, ili sene sizibahala ka Caprivi kwanaha Namibia kasilimo sa 1999. 

Likwambuyu yabona Zamabasi ni Zamiseto, Frans Kapofi nakile afa liseli hala kalulo yeo kubandu yamilao viki yefelile. Naize masheleñi nalukisizwe kulatelela babalehi habahana kuiñolisa nikatengo ka UN kuli bakute kusina kapelezo. Kabe nebalumezi, Kapofi naize nebakafumana masheleñi kuzwelela kwakatengo ka kakabona zababalehi ka UN alikana N$3 800 (U$300), mutu ni mutu yana ni lilimo ze 13 nikufita, ni N$1 300 yana nililimo ze 12 kukutisa fafasi. Kapofi naize kuekeza famali alikana bolule babalalu ni licika, muuso nobafile lico zalikweli zetalu, lisebeliso zakuyahisa mandu, hamoho cwalo ni linzila zakubaisa kwamahae abona. Nabulezi hape kuli muuso noñolisize nikukenya likolo banana babao nebabalehile. 

“Banana bane bañola litatubo zasitopa sa 12 nebakutile kwanaha Botswana kuli bayo ñola tatubo. Kamukwa oswana bane baeza lituto babupangapanga bakutile kwakuyo ñola litatubo,” nabulezi. Nabulezi hape kuli makete abona niona akatalimwa sina tubuka twamakete hane tungilwe. Nabulezi hape kuli liluko lahae lika balukiseza mapampili abuizibahazo. Mi bale babase bakwanisize lilimo ze 60 bakakala kuamuhela masheleñi abusupali ili ayemi fa N$1 250. “Lindiala nibanana babasina hande pabalelo nibona nebañolisizwe kuli bano fumana masheleñi afiwa babacwalo,” nabulezi. “Muuso utiselize pabalelo yasicaba, mi ukabona kuli bafumana litukelo ni liswanelo zelukiselizwe bayahi banaha Namibia.”