Home / Muyahi umatela muyaho wamaino abaituti kwa Luhonono Muyahi umatela muyaho wamaino abaituti kwa Luhonono
Aron Mushaukwa Luhonono-Sicaba sa Luhonono mwasilalanda sa Kabbe ya Mutulo sabilaela mi siswabile hala kuyahiwa kwa maino abaituti kwa sikolo sa Schuckmansburg Combined School. Nihakubonahala kuli mungelo noyepilwe mwakweli ya Njimwana ñohola, muyahi hasikabonwa hape, mi kuyaha nekuyemi mwakweli ya Liatamani. Sicaba sibialela kuli kukanga lilimo kuli muyahi akute kuyofeleleza musebezi. “Nebawisize makilasi asitina amabeli habakala kuyepa mungelo mi nebabulezi kuli baka’yaha onafo feela, kono kuzwa kweli ya Liatamani halusikababona hape. “Sicaba haisi nesiyahile makilasi aswalele kuli bana baluna bakenalange mwateñi, ili taba yesiyo hande, kakuli hakubata bana baluna bakuña mi hakucisa baca,” nekubulezi yomuñwi wasicaba. Bazwelapili kutalusa kuli mungelo sofetuhile sisitataliso kwasicaba mi nikukala kwalitabula, sofetuhile mazwalelo aminañi. “Bana baluna bakena fasikolo fa, maticele baluna bateñi fa. Kona seo Liluko Lamakete lisibulela? Kimulyani mañi olukasela mwani? Hakuna. Kacwalo luna nisabo kwa bana baluna ni maticele baluna kuamana nimungelo wani,” nekubulezi mulyaminzi yomuñwi wa Luhonono. “Nako yeñwi nja newezi mwa mungelo nikushwa, konji haikala ku nunka kona lulemuha kuli nja newezi mwateñi. Haisi kubulelela banana kuli baizwise mwateñi,” nabulezi. Sicaba sibilaela hape kuli malaiti nakumuzwi kwamandu aswalelele amaticele, ili ana wisizwe kuli kuyahiwe maino abana basikolo. Haisi nebayahezi maticele mandu amañwi, kono nebabulelezwi kiba Nored kuli haiba babata malaiti kuli akutisezwe baswanezi kulifa N$29 000. Hanakupilwe kualabela falitaba zeo, muyemeli wasilalanda sa Kabbe ya Mutulo Peter Mwala napatuluzi kuli kuyahiwa kwa maino abana basikolo nekulilimanisizwe kakuli hakusana masheleñi. Nazwezipili kutalusa kuli katengo kasikiliti kasweli kubata masheleñi kuli muyaho uyo felelezwa. Nabulezi kuli hakuna nako yetomilwe kuli muyaho ukayofelelezwa lili, kono kuitingile feela fokafumanehela masheleñi.
Your experience on this site will be improved by allowing cookies.
