• November 15th, 2018
Login / Register

Muyahi uzekisa Katima hala kuwiswa kwandu yahae


Roland Routh Windhoek-Yomuñwi wabao mandu abona nawisizwe mwa Katima Mulilo ñohola, ili taba yene tisize lipilaelo kuzwelela kwasicaba, ukwalezi katengo katolopo, Muzaimaisi wakatengo katolopo Raphael Liswaniso ni Liluko lelibona Zazwelopili Yalitolopo ni Libaka Zamatakanyani muzeko hala lisinyehelo mwakuwisa ndu yahae. Obrean Kafuma Matongo ubata N$1,185,216.05 hala lisinyehelo zene bile teñi, kuekeza N$200,000 yakuloba liswanelo zahae. Katengo katolopo nekawisize myanda yamiyaho mwalikomponi za Choto, Cowboy, Dairy, Macaravan East, Macaravan West, nimwa Mahohoma, ili miyaho yeo katengo kabulelela kuli neyahilwe isi kamulao. Miyaho yeñwi yene yahilwe katengo katolopo kasazibi niyona newisizwe. Kezahalo yeo netisize sililo kuzwelela kwasicaba, mi yoneli Likwambuyu wa Zwelopili Yalitolopo ni Libaka Zamatakanyani, Sophia Shaningwa, nakile abiza kezahalo yeo kuba yakusalatelela mulao, kakuli katengo katolopo nekasina taelo yezwa kwakhuta yene balumelela kuli bawise miyaho yene yahilwe isi kamulao. Kezahalo yeo nesiile nombolotuna yabatu basina maino nikutokwa sepo, libyana zabona inze lili fañandaleza. Kakuya kaze ñozwi mwamuzeko wanakwaluzi Matongo, katengo katolopo nekasikalatelela mulalo mi nekaeze mafosisa hane kawisize ndu yahae mwakomponi ya Cowboy mwa Katima Mulilo la 5 Yenda 2017. Naize ndu newisizwe kusina liñolo lataelo kuzwelela kwakhuta, ili taba yene lobile mulao wakalulo yabulobañwi, wabu 13 ni 16 wamutomopuso wanaha Namibia, ili obulela zaliswanelo zamutu hala butu, mukunda niswanelo yakuba nimaino. Ubata N$534,832.05 hala kuyahiwa kwandu yahae, N$422,610.40 hala lisinyehelo zalibyana zeneli mwandu haiwiswa ni N$210,198.60 yakuli ayolise motikkala yahae yamufuta wa Toyota Corolla yenesinyizwe, kapa afiwe pene yeswanela kuli ayopangisa motikala yahae. Usa bata kufiwa N$17,575 yalisinyelo zene bile teñi hana bata maino ahae nilubasi lwahae kasamulaho ndu yahe haiwisiwa. Matongo ubulela kuli likezo zakatengo katolopo nelilobile liswanelo zabutu zefumaneha mwakauhanyo yabulalu wamutomopuso wanaha Namibia, sihulu wakumutokwisa likute kakuli yena nilubasi lwahae neba shwauzwi, nikubasiya basina maino. “Zeo kaufela zebulezwi lisupa litaba zaloba liswanelo zabatu nanaha Namibia ili zene ambalakani sihulu mwatolopo ya Katima Mulilo,” nekubaleha liñolo lamuzeko one ukwaluzwi kimuyemeli, Henry Shimutwikeni. Matongo ubata N$200,000 yakumushwaula. Nakupile hape kuli kube nikekezo ya 20% silimo ni silimo kuzwelela nako yeo katulo haikafiwa. Katengo Katolopo ya Katima Mulilo, Liswaniso ni Liluko la Zwelopili ya Litolopo ni Libaka Zamatakanyani nekabonisize kuli kaka itwanela mwamuzeko.
New Era Reporter
2018-03-12 12:42:55 8 months ago

Be the first to post a comment...