Home / Muyaho wapisinisi yabucwañi ukakwalulwa Muyaho wapisinisi yabucwañi ukakwalulwa
John Muyamba Rundu-Muyaho wapisinisi yekana ileka bucwañi kwabatu use ufelile kuyahiwa mi kulumelwa kuli ukabapala kalulo yetuna kutusa sicaba babaitengile walipisinisi zakulekisa bucwañi mwalikiliti za Zambezi ni Kavango. Muyaho ulibelezi feela babakona ku usebelisa kakulifa mali. Muyaho uwela kwamuyahotuna wamakopanelo alipisinisi ili one uyahilwe ki Liluko la Litekisano nikuhula kwa Lipisinisinyana, kamulelo wakubata kuhulisa lipisinisi mwanaha. Muyaho uzamaiswa kikatengo ka Namibia Development Corporation (NDC) mi kanako yacwale katengo kamema balipisinisi kaufela babatabela kusebelisa muyaho kuli babonane nibona. Kulumelwa kuli bucwañi busebeliswa hahulu isi feela Mwa Kavango ni Zambezi kono naha kaufela kabupala. “Ee muyaho ukona kusebelisa kakulifa mali kanako yatumelelano babatabela batise mapampili abona pili la 2 Liatamani lisikafita kale. Mi babatabela kaufela balizeze ofesi ya NDC mwa Rundu,” nekubulezi yomuhulu wamaofesi a NDC mwa Rundu Fernando Murungu. Muyaho nokalilwe kuyahiwa kasilimo sa 2014 kamulelo wakutisa lituto hamoho cwalo nikutisa zwelopili mwalipisinisi zabucwañi. Ba NDC babulela kuli balekisi babucwañi bakakona kulekisa bucwañi bobusika alafiwa kwapisinisi yeo kuli buyobakanywa, isi nako yacwale balekisi babucwañi habaputelelwanga kibaleki kuli balekise bucwañi bwabona kakucipa. Balipisinisi zakwamukunda babakabelekisa muyaho bakatokwiwa kuli banoya kwabatu nikuyoleka bucwañi nikubuisa kwamuyaho walipisinisi, ili koo bukayo alafiwa nikubakanywa pili busikaiswa mwalikiliti. Kalulo yeo ikulubelwa kuli ikafukuza kuyambukela kwa butuku bwa taku ni mulomo kuzwa mwasikiliti sesiñwi kuya kusesiñwi kakuli kuse kulemuhilwe kuli bucwañi kinzila yeñwi butuku bwa taku ni mulomo buyambuluka kayona. Muyaho hape ukafa bayahi bamandu abucwañi mwamahae lituto zeswanela.
Your experience on this site will be improved by allowing cookies.
