Muzamaisi wa katengo kamunzi wa Bukalo, Martin Limbo, ukulubelwa kuli uhanile kusiya ofesi, nihaike kuli nako yana filwe yakubeleka nefitile kwa mafelo la 31 Kandao, mi katengo nekasika iekeza. Muinasipula wa katengo kamunzi wa Bukalo Candy Namatama, nanitifalize kuli katengo nekasika ekeza nako ya Limbo. Naize Limbo nahanile kutambeka linotolo zakwa ofesi, nihaike nafilwe temuso la 24 Yowa kuli nako yahae yakusebeza haina kuekezwa. Mwatemuso yene filwe ku Limbo, Namatama nakile añola kuli kakuya ka kalulo yabu 27 (b) (i) ya kamaiso ya tutengo twa litolopo ya 1992, sina hane italimilwe sinca, ni kulatelela buiketelo bwa katengo kamunzi hala mukopano one uezahalile la 17 Yowa 2020, katengo nekaiketezi kusa ekeza nako yakusebeza ya Limbo. 

Namatama naize katengo kalibelezi kelezo kubamulao kuzwelela kwa muuso mwa ofesi ya muyemeli yomuhulu kuli kueziwa cwañi. Hana kupilwe kuikalabela, Limbo nahanyelize kuli nafilwe temuso kuzwelela kwa katengo ka munzi kuli azwe mwa ofesi, mi naize mwendi temuso yeo isa taha. “Haniyo mwa ofesi, niyanga feela kwateñi kuyo hatisa mapampili, kakuli neni filwe kuli nifeleleze piho yaka, kuli nito tambeka yataha. Hanisika zibiswa kale kabe baketile mutu kuli aswale musebezi swalelele, kapa balibelezi liluko kuli lilumele mutu yeniswanela kuto tambeka musebezi,” Limbo nabulezi.  

“Niziba feela kuli likwambuyu uhanile maikuto akatengo akusa cafaza peleko yaka, mi liñolo kuzwelela kwaofesi yahae kuli ni siale mwaofesi lika lumelwa. Nisalifumana feela nika ikabela lona ni mina. Nilumela kuli lika lumelwa nikwa katengo.” Mwakubata kuli peleko yahae iekezwe, Limbo naisize katengo kwa khuta yebona zamisebezi, ili teñi mukopano wamuzeko ulibelezwi kuezahala kukala la 1 kuisa la 3 Muimunene mwa Katima Mulilo. Mwaliñolo la 6 Kandao lene libonwi ki New Era ili lene liya kumuzamaisi wa katengo kamunzi wa Bukalo, Muyemeli Chris Mayumbelo nibakuyena balaela kuli katengo kacafanze peleko ya Limbo, kasamulaho wakufela kwayona la 31 Kandao 2020, kalilimo zeketalizoho kuisa la 31 Kandao 2025.

“Piho ya mukopano wa la 17 Yowa 2020, teñi muhupulo wa mina wakulundula mutu waluna nongilwe, kapa notahisizwe kakulatelela kalulo yabu 15 (1) yakamaiso yatutengo kwa tolopo ya 1992 sina moucafalizwe,” kubaleha liñolo. 

Katengo nekakile kalilimanisa Limbo famusebezi la 7 Yenda 2016 inze ahola tuwelo yetezi, mi nakile asiswa musebezi la 19 Muimunene 2017. Taba nekile yazekiwa mwa khuta yebona zamisebezi kufitela la 14 Mbuwana 2019 haito feela. Limbo ukile awina taba mi nakutiselizwe famusebezi kukala la 1 Yenda 2019. Kono kanako yeo nasa siyalezwi feela likweli zelobañwi hala peleko yapili yene feela la 31 Kandao unumwaha, kakuli nakalile la 1 Mbuwana 2015. Bayemeli bahae babulela kuli katengo kakaswana kakasalati kucafanza peleko yahae neka ilyanganisize.