Kusabonahala kwasikwata sene sizekisa mubuso kamasheleñi afitelela bolule bamwanda kabamashumi amalalu kabalobañwi (N$139 million), kakuzekiswa kamafosisa kasamulaho akusa fumanwa mulatu mwataha yabukwenuheli mwakubata kuyekuyula sikilitisa Caprivi kwanaha Namibia, nekutisize kuli taba yabona izuswe famukoloko wakhuta viki yefelile. Mubakweli kuyomuhulu waba atuli Hosea Angula, naize muzeko wasikwata nokuzize mwalikweli zesilezi. Khuta ikandekile nisikwata kono nekusina tuso. Kacwalo viki yefelile sikwata kapa bayemeli babona haba palelwa kubonahala, taba yabona netakuzwi famukoloko walitaba zena nikuzekiwa mwakhuta.

Mwapiho yene kenyizwe mwakhuta la 21 Njimwana 2021, sikwata nesi ize bakeñisa kutokwa masheleñi nekubabela tata kunonga musipili kuzwa sikiliti sa Zambezi kutaha Windoko kwa khuta. Robert Lifasi Chelezo, Victor Kabende Makando, Richwell Mbala Manyemo, Gibson Kabuna Luka, Gabriel Nyambe Ntelamo ni Patrick Itwa Likando nebazekisa likwambuyu wasilelezo, yomuhulu wabazekisi bamubuso ni mubuso kakuzekiswa kamafosisa ni kutamiwa isi kamulao. Nebalukuluzwi kasilimo sa 2015, kasamulaho akutamiwa mwasilimo sa 1999.  Mwamuzeko wabona nebaize bakeñisa kutamiwa kwabona nebalatehezwi kimisebezi, maino, masimu, lipisinisi, likomu ni masheleñi akupumula famusebezi.