Mwene womukunda Okambembe, Filemon Nghipangwa okwa kufwa moilonga oule weemwedi mbali konima eshi kwa li a patela oikulya yoshikukuta mondingosho yaye ili mOkambembe moshitukulwa Ohangwena.

Edi oda kolekwa kelenga, mwene woshikandjo Omungwelume Linda Mwaetako eshi a hokolola ta ti ombelewa yaye oya ninga onghendabala opo mwene womukunda a kale a kufwa moilonga manga taku ningwa omakonakono kombinga yoshikumungu eshi.

Okwa ti ovakwashiwana ova hoolola okanguduwiliki ta ka kala taka wilike omukunda oule weemweedi mbali.

“Ohandi kunghilile oshiwana opo shi kale tashi longele kumwe novawiliki va hoololwa okukala tava wilike omukunda,” Mwaetako ta ti. 

Momwedi Maalitsa neudo ova kwashiwana holola ehandu lavo eshi mwene womukunda wavo va ti a kala a patela oikulya yoshikukuta monduda yaye yamangeshefelo okudja momudo 2020. Oshiwana osha ti osha handuka neenghono eshi oukutu 12 nomakende omaadi atano. 

Omafiku a pita Ovakambebe okwa li va ninga omunyano wopambili tava pula elelo laUkwanyama li kufe moilonga mwene womukunda wavo.

Efiku olo onduda ya mwene womukunda okwa li ya teywa shaashi ka kwali pe na eeshapi dokupatulula
po eshi vati da kana okudja omudo
2020. 

Umwe womovakalimo mOkambebe, omukulupe weedula 65 okwa lombwele Kundana ta ti ova uda nai neenghono eshi oikulya yoshiwana ya hepa, omanga momukunda mu na ovanhu va dengwa kondjala.  Ta ti a inava hala vali okulelwa kuNghipangwa shaashi ke na oshisho noshiwana. 

Ovakwashiwana ova hokolola tava ti nokeumbo lamwene womukunda okwa li kuna natango oukutu nomakende omaadi a patelwa monduda yokutuvikila ashike vati okwe ke va kupule metale lili momukunda waye.

 Pefimbo ta nyamukula omapulo oshiwana, mwene womukunda Nghipangwa okwa ti kakwa li e shi ngeenge monduda yaye omu na oikulya yoshikukuta shaashi konduda okwe lixula ko okuya ko momudo 2020. – fhamalwa@nepc.com.na