New Era Newspaper

New Era Epaper
Icon Collap
...
Home / Namibia ikwala kuleka lico mwa Zambia

Namibia ikwala kuleka lico mwa Zambia

2018-01-17  Staff Report 2

Namibia ikwala kuleka lico mwa Zambia
Aron Mushaukwa Katima Mulilo-Muuso wanaha Namibia use ukwalile swalelele kuleka lico zebola, miselo, lico zesikabakanywa, hamoho cwalo ni mezi kuzwelela mwa naha yeli mabapa ya Zambia – ili teñi butuku bwa ncwa sebubulaile batu babafitelela mashumi asilezi. Kukwaliwa nekukalile Lamubulo la 8 Sope viki yefelile, mi nekutile kamulelo wakubata kutibela kuyambuluka kwabutuku bobutaselize naha Zambia, ili mo nebukalile mwakweli ya Muimunene ñohola. Cwalecwale nekubihilwe piho iliñwi yancwa mwa tolopo ya Livingstone, libima zebato eza ze myanda yemibeli kuzwa kwamuseto wanaha yani ni Namibia. Piho yeo kubonahala kuli nesundile muuso kuli ukwale kuleka nikukenisa lico zezwelela naha yani. Buñata bwa bayahi banaha Namibia kwa upa mwasikiliti sa Zambezi, baleka – mane linako zeñwi bakenisa isi kamulao, bupi bwa bonyi ni miselo yeswana sina mango kuzwelela mwa Zambia. Babeleki baliluko la makete nebabile nimukopano waputako Labubeli kwamuseto wa Wenela kuyozibisa babeleki bakwa museto kuli hakuna lico zezwa mwa naha Zambia zeswanezi kulumelelwa kukena mwa Namibia. Hana bulela niba New Era, mubeleki wamakete Lempie Onesmus naize babeleki bamakete baitukiselize, mi batu kaufela babakena mwa naha kuzwelela naha Zambia batatubiwa. “Mutu hafita, mubeleki wamakete utatuba kucisa kwa mubili kwamupoti yoo. Haiba kucisa kwamubili kupahami hahulu, katatubiso kakalila kakuli kapingilwe sina cwalo. Mi hape kuitingile falisupo zana nizona mutu yacwalo. Kamutala, haiba mutu yoo ukula butuku bwa ncwa ukana ataza ni kusulula,” atalusa. Onesmus naelelize kuli sicaba basike basaba kakuli kukwaliwa kwakuleka lico kikwanakonyana feela kufitela mayemo haka ombalala mwanaha Zambia. Naekelize kuli kwanda’ piho iliñwi mwa Livingstone hakuna lipiho zeñwi zene bihilwe mwalibaka zeli bukaufi ninaha Namibia. Zeo halilicwalo bamakande mwanaha Zambia Lamubulo viki yefelile nebabihile kuli lipiho zabutuku bwa ncwa lisweli kuekezeha mwa muleneñi wa Lusaka, mi kutisa cwale lipiho liyemi fa 2,600 mi batu ba 66 base batimezi. Muuso wa Zambia uiketezi kuhatisa mulao wanaha wabu 79, ili kukwala mikopano kaufela yasicaba mwalibaka zetaselizwe kibutuku – mikopano yeswana sina kulapela, kusilisa hamoho cwalo niya kunwa bucwala, ili kuli kusike kwaba nikuyambula kakuswalana. Banyatisisi babulela kuli naha Zambia iswanezi kamapilipili kubata linzila zakutibela butuku kakuli tiyeho yakueza cwalo ikona kutisa mayemo maswe kwasifumu sa naha - mwanaha yelekisa hahulu kopa.
2018-01-17  Staff Report 2

Tags: Khomas
Share on social media